ކައުންސިލްތައް އިންތިޚާބު ކުރަނީ ސަރުކާރު ޖަވާބުދާރީ ކުރުވުމަށް ކަމަށް ދެކޭ ދެކުމަކީ ކުށް ހީއެއް ކަމަށާއި، ކައުންސިލްތަކަކީ ވެރިކަން ހިންގުމުގެ ނިޒާމުގެ ތެރޭގައި ހިމެނޭ މުހިންމު ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ވެރިކަން ކުރާ ޕީއެންސީގެ އައު އޮފީސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ފާހަގަކުރެއްވި ގޮތުގައި، ޖަވާބުދާރީ ކުރުވުމުގެ ނިޔަތުގައި މެންބަރުން ހޮވައިފިނަމަ، ރަށްރަށުގެ ތަރައްޤީއާއި މުނިސިޕަލް ޚިދުމަތްތައް ހުއްޓި، އެތަންތަން ސިޔާސީ ޖަގަހަތަކަށް ބަދަލުވެގެންދާނެއެވެ.
ކުރިއަށް އޮތް ލޯކަލް ކައުންސިލް އިންތިޚާބަށް އިޝާރާތް ކުރައްވައި ރައީސް ވިދާޅުވީ، ސަރުކާރުން ރާވާފައިވާ ބޮޑެތި މަޝްރޫޢުތައް ހަލުވިކަމާއެކު ކުރިއަށް ގެންދިއުމަށް ކައުންސިލްތަކުގެ އެއްބާރުލުން ކޮންމެހެން ބޭނުންވާ ކަމަށެވެ. އިދިކޮޅު ފިކުރުގެ ސަބަބުން މިހާރުވެސް ބައެއް ކައުންސިލްތަކުން ތަރައްޤީއަށް ހުރަސްއަޅަމުންދާކަން ފާހަގަކުރައްވައި، އެމަނިކުފާނު ވަނީ ތަރައްޤީގެ ދުވެލި މަޑުނުޖެހޭނެ ފަދަ ގޮތަކަށް އިންތިޚާބުގައި ގޮތް ނިންމުމަށް ރައްޔިތުންގެ ކިބައިން އެދިވަޑައިގެންފައެވެ. ދައުލަތުގެ އިސްވެރިން ބައިވެރިވެވަޑައިގެންނެވި މި ޖަލްސާގައި ރައީސް ވަނީ މި ސަރުކާރުން އަބަދުވެސް އިސްކުރާނީ ޤައުމީ މަސްލަހަތުކަން ތަކުރާރުކުރައްވާފައެވެ.
ކޮމެންޓު ފޮނުވާ