ކުޑަ އަންބަރާ ކައިރީގައި އަލިފާން ރޯވި ސަފާރީގައި ތިބި މީހުން ފެލިދުއަށް ގެންގޮސްފި

ވ. އަތޮޅު ކުޑަ އަންބަރާ ކައިރީގައި އޮއްވައި މިއަދު އަލިފާން ރޯވި "ޔަސާވާ ޕްރިންސަސް" ސަފާރީގައި ތިބި 25 މީހުން ސަލާމަތުން ފެލިދުއަށް ގެންގޮސްފައިވާ ކަމަށް ފުލުހުން ބުނެފިއެވެ. އަލިފާން ރޯވިކަމުގެ މައުލޫމާތު މިއަދު މެންދުރު 5:54 ހާއިރު ފުލުހުންނަށް ލިބުމާއެކު، އެ ސަރަހައްދަށް ވަރަށް އަވަހަށް ވަޑައިގެން ސަފާރީގައި ތިބި މީހުންނާއި ފަޅުވެރިން ސަލާމަތްކޮށްފައިވާ ކަމަށް ފުލުހުން މައުލޫމާތު ދީފައި ވެއެވެ.

ސަލާމަތްކުރި މީހުންގެ ތެރޭގައި 17 ފަތުރުވެރިންނާއި އަށް ފަޅުވެރިން ހިމެނެއެވެ. ފަތުރުވެރިންގެ ތެރޭގައި ފަސް ފިރިހެނުންނާއި 12 އަންހެން މީހުން ހިމެނޭއިރު، ފަޅުވެރިންގެ ތެރޭގައި ތިން ދިވެހިންނާއި ފަސް ބަންގްލަދޭޝް ރައްޔިތުންނާއި ޖަރުމަނު މީހެއް ހިމެނެއެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމަށް ރިޕޯޓެއް ލިބިފައި ނުވާ ކަމަށް ފުލުހުން ހާމަކުރައްވައިފިއެވެ.

ފުލުހުން އެ ސަރަހައްދުގައި ހަރަކާތްތެރިވަމުންދާއިރު، އަލިފާން ނިއްވުމުގެ މަސައްކަތް އެމްއެންޑީއެފުން ކުރަމުންދެއެވެ. މި ހާދިސާގައި ބަލަންޖެހޭ ކަންކަން ފުލުހުން ބަލަމުންދާ ކަމަށް ބުނެފައިވެއެވެ.