ބިދޭސީން ޤަވާއިދާ ޚިލާފަށް ހިންގަމުން ދިޔަ 47 ވިޔަފާރި މިވޭތުވެދިޔަ ދެ ހަފްތާގެ ތެރޭގައި ބަންދުކޮށްފައިވާ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. މި ވިޔަފާރިތަކުގައި ފާހަގަވާ ކަންކަން ބެލުމަށް ފުލުހުންގެ ތަހުޤީޤެއް ފަށަން ތައްޔާރުވަމުން އަންނަ ކަމަށް ވަޒީރު ވިދާޅުވިއެވެ.
ދުވެލި ޕްރޮގްރާމުގައި ވާހަކަދައްކަވަމުން ވަޒީރު ވިދާޅުވީ މަނީ ލޯންޑަރިންއަށް ޝައްކުވާ ތަންތަންވެސް މި އޮޕަރޭޝަންގެ ތެރޭގައި ފާހަގަވެފައިވާ ކަމަށެވެ. އެފަދަ ތަންތަނުން ލާރި ހޯދާ ގޮތްތަކާއި ދައުރުކުރާ ގޮތްތައް ބަލާފައި ޖިނާޢީ މިންގަނޑުން ދައުވާކުރަން ޖެހިއްޖެނަމަ ދިވެހި ވިޔަފާރި ރަޖިސްޓަރކޮށްފައިވާ ފަރާތައް ދައުވާކުރައްވާނެ ކަމަށްވެސް ވަޒީރު ވިދާޅުވިއެވެ.
ސަރުކާރުން ކުރަމުންދާ މަސައްކަތުގެ ނަތީޖާ މިހާރު ފެންނަމުންދާ ކަމަށް ވަޒީރު ވިދާޅުވިއެވެ. ބިދޭސީން ހިންގަމުންދިޔަ ވިޔަފާރިތައް ބަންދުވެ، ދިވެހި ވިޔަފާރިތަކުން ޚިދުމަތް ހޯދާ މިންވަރު އިތުރުވެފައިވާ ކަމަށް ވަޒީރު ވިދާޅުވިއެވެ. ޤަވާއިދާ ޚިލާފަށް އުޅޭ ބިދޭސީން ހޯދުމަށް ހުރިހާ ކަމާގުޅުންހުރި އިދާރާތަކުން ގުޅިގެން ބޮޑު އޮޕަރޭޝަނެއް ހިންގަމުންދާއިރު، ފާއިތުވި ދެ އަހަރުގެ ތެރޭގައި ޤަވާއިދާ ޚިލާފަށް އުޅުނު އަދި ޖިނާޢީ ކުށްތަކުގައި ބައިވެރިވި 9188 ބިދޭސީން ވަނީ ރާއްޖެއިން ޑީޕޯޓުކޮށްފައެވެ.
ކޮމެންޓު ފޮނުވާ