ދިވެހި ޤައުމަށް އިލްމީ، އަދަބީ، އަޚްލާޤީ އަދި ސަގާފީ އިންޤިލާބީ ބަދަލެއް ގެނައުމަށް ބޭނުންވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ގައުމިއްޔަތު މިނިސްޓްރީން މި އަހަރު ބޭއްވި އަދަބީ މުބާރާތްތަކާއި އަތުލިޔުން މުބާރާތުގެ އިނާމުދިނުމުގެ ރަސްމިއްޔާތުގައި ރައީސް މިހެން ވިދާޅުވީ ރޭ ހުޅުމާލޭގައި ހުންނަ ސަލާޙުއްދީން ސްކޫލުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ދިވެހި ތާރީޚުގެ ދާއިރާއަށް އިންޤިލާބީ ބަދަލެއް ގެނައުމަށް މަސައްކަތްކުރަމުން އަންނަ ކަމަށް ރައީސް ވިދާޅުވިއެވެ. އެގޮތުން ދިވެހިބަހާއި ސަޤާފަތާއި ތާރީޚާ ބެހޭ ޚިދުމަތްތަކަށް ވަކި ވުޒާރާއެއް އުފައްދާފައިވާކަން ފާހަގަކުރައްވާ، ތާރީޚު ދިރާސާކުރާ ޤައުމީ މަރުކަޒެއް ގާއިމުކުރެވިފައިވާ ކަމަށް ވިދާޅުވިއެވެ. އަދި ދިވެހި ޤައުމިއްޔަތުގެ އިސްވެރިކަން އުފައްދާ، ދިވެހި ބަހުގެ އެކަޑެމީ އަދި ދިވެހި ޤައުމީ ދާރުލްއާސާރު ފަދަ މުއައްސަސާތަކުގެ ޚިދުމަތްދިނުން އެއްކުރުވައި، ދިވެހި ތާރީޚުގެ ދާއިރާ ވަކި އެއް ދާއިރާއެއްގެ ގޮތުގައި ތަރައްޤީކުރުމުގެ މަސައްކަތް ކުރިއަށްދާ ކަމަށް ރައީސް ވިދާޅުވިއެވެ.
ދިވެހިބަހާއި ދިވެހިވަންތަކަން ފޯރުވައިދިނުމަށްޓަކައި ފޮތް ލިޔުއްވާ ފަރާތްތަކަށް ފޮތް ޗާޕުކުރުމުގައި ކުރިއަށް އޮތް ތާނގައި ޚާއްޞަ ގޮތްތަކެއް ސަރުކާރުން ހަމަޖައްސައިދޭނެ ކަމަށް ވެސް ރައީސް ވިދާޅުވިއެވެ. ދިވެހިބަސް އެއްޖީލުން އަނެއް ޖީލަށް ރައްކާތެރިކަމާއެކު ފޯރުކޮށްދިނުމަށް ކުޑަކުދީންނަށް ކިޔާނެ ފޮތްތައް ބޭނުންވާ ކަމަށާއި، ނަމަވެސް ފޮތް ޗާޕުކުރުމުގެ ޚަރަދު ބޮޑުވުމުން އެ މަސައްކަތަށް ބޮޑެތި ހުރަސްތައް ދިމާވާ ކަމަށް އެމަނިކުފާނު ވިދާޅުވިއެވެ.
މިއީ ޤައުމީ މައްސަލައެއް ކަމަށާއި އަޅާނުލައި ދޫކޮށްލާނެ ކަމެއް ނޫން ކަމަށް ފާހަގަކުރައްވާ، ދިވެހި މާދަރީބަސް ފޯރުވައިދޭނެ މަގުތައް ތަނަވަސްވެފައި އޮންނަން ޖެހޭނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ