ހުޅުމާލެ ގެއެއްގެ ގްރައުންޑް ފްލޯގައި ބަހައްޓާފައި ހުރި 140،000 ރުފިޔާގެ އަގުހުރި އިންޖީނެއް ވަގަށް ނެގުމުގެ މައްސަލައެއް ހުށަހެޅުމާއި ގުޅިގެން ފުލުހުން ހިންގި ތަހުގީގުގައި އިންޖީނު ހޯދައި ވެރިފަރާތާ ހަވާލުކޮށްފިއެވެ.
މި ޑިސެންބަރު މަހުގެ 17 ވަނަ ދުވަހު ވަގަށް ނެގި 40 ހޯސްޕަވަރުގެ އިންޖީނު ހޯދިފައިވަނީ ހުޅުމާލޭގައި ހުންނަ ބައު ދަގަނޑު ކިރާ ތަނަކުން ކަމަށް ފުލުހުން ބުނެއެވެ. ތަހުގީގަށް ލިބުނު މައުލޫމާތުގެ މަތިން މި މަހުގެ 18 ވަނަ ދުވަހު އެތަން ބަލައިފާސްކުރިއިރު، އިންޖީނުގެ ބައެއް ބައިތައް ފެނިފައިވާއިރު، އިންޖީނު ނުއަގުގައި 1،083 ރުފިޔާއަށް ވިއްކާލާފައިވާކަން ފާހަގަކުރެވިފައިވެއެވެ.
މިމައްސަލައާ ގުޅިގެން މީހަކު ހައްޔަރުކޮށްފައިނުވާއިރު، ހުޅުމާލެ 1 ޕޮލިސް ސްޓޭޝަނުން ތަހުގީގު ކުރަމުންދާކަމަށް ފުލުހުން ބުނެއެވެ. ވަގަށް ނަގައިގެން ރިޕޯޓްކުރާ މުދާ ގިނަފަހަރަށް ނުއަގުގައި އެހެން ފަރާތްތަކަށް ވިއްކާލާފައި ހުންނަތަން ފާހަގަކުރެވޭކަމަށް ބުނެ، ބޭނުންކުރި މުދާ ގަންނަ ފަރާތްތަކުން އެތަކެތީގެ ވަރުގަދަ މައުލޫމާތު ސާފުކޮށް، ވައްކަމުން ހޯދާފައިވާ މުދާނޫންކަން ކަށަވަރުކުރުމަށް ފުލުހުން އިލްތިމާސްކުރެއެވެ. މިކަން ކުރުމުގައި ފަރުވާކުޑަކުރާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށްވެސް ފުލުހުން ވަނީ ބުނެފައެވެ.
ކޮމެންޓު ފޮނުވާ