ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާދަމާ ރޭ ހުޅުމާލެ ފޭސް އެކެއްގެ ރައްޔިތުންނާ ބައްދަލުކުރައްވާނެ ކަމަށް ރައީސް އޮފީހުގެ ތަރުޖަމާން ހީނާ ވަލީދު ވިދާޅުވެއްޖެއެވެ. ޑިސެމްބަރު 21 ވަނަ ދުވަހުގެ ރޭ 20:30 ގައި ރެހެންދި ސްކޫލްގައި އޮންނާނެ މި ބައްދަލުވުމަކީ ރައީސް ރައްޔިތުންނާ ގާތުން ބައްދަލުކުރައްވައި އެކި ކަންކަމުގައި ހިޔާލާއި މަޝްވަރާ ހޯއްދެވުމަށް ބާއްވަވާ ސިލްސިލާ ބައްދަލުވުންތަކުގެ ތެރެއިން ބާއްވަވާ ބައްދަލުވުމެކެވެ. ހީނާ އެކްސްގައި ކުރެއްވި ޕޯސްޓެއްގައި ހުޅުމާލޭ ފޭސް އެކެއްގައި ދިރިއުޅޭ ހުރިހާ ރައްޔިތުންނަށް މި ބައްދަލުވުމުގެ ދައުވަތު އަރުވާފައިވެއެވެ.
މީގެ ކުރިން ރައީސް ވަނީ ހުޅުމާލެ ފޭސް ދޭއާއި މާލޭގެ އެކި އަވަށްތަކުގެ ރައްޔިތުންނާވެސް ބައްދަލުކުރައްވާފައެވެ. މީގެ ތެރޭގައި ވިލިމާލެ، މާފަންނު، މައްޗަންގޯޅި، ގަލޮޅު އަދި ހެންވޭރުގެ ރައްޔިތުން ހިމެނެއެވެ. މިދިޔަ ބުރާސްފަތި ދުވަހުގެ ރޭވެސް ރައީސް ވަނީ ހުޅުމާލޭ ފޭސް ދޭއްގެ ރައްޔިތުންނާ ބައްދަލުކުރައްވައި ވަރަށް ގިނަ ވަގުތު ހޭދަކުރައްވައިފައެވެ. މި ބައްދަލުވުންތަކުގައި ރައީސް ގެންދަވަނީ ރައްޔިތުންގެ ސުވާލުތަކަށް ޖަވާބު ދެއްވައި ޝަކުވާތައް ސީދާ އަޑުއައްސަވަމުންނެވެ. ރައީސް މުއިއްޒު ވެރިކަމަށް ވަޑައިގެންފައި މިވަނީ ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން އެ ރަށްރަށުގެ ރައްޔިތުންނާއި ކައުންސިލްތަކާއި މުޖުތަމައުގެ ތަރައްގީއަށް މަސައްކަތް ކުރާ ފަރާތްތަކާވެސް ބައްދަލުކުރައްވައިފައެވެ.
ކޮމެންޓު ފޮނުވާ