ސަރުކާރުން ދިވެހި ވިޔަފާރިތަކަށް ދޭންޖެހޭ ފައިސާ އަންނަ ރޯދަމަހުގެ ކުރިން ދައްކައި ނިންމާލުމަށް މަސައްކަތް ކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ކުދި އަދި މެދުފަންތީގެ ވިޔަފާރިންނާ ސޯޝަލް ސެންޓަރުގައި ބޭއްވި ބައްދަލުކުރެއްވުމުގައި ރައީސް ވިދާޅުވީ މި މަހުގެ ނިޔަލަށް ގިނަ ބިލްތަކަށް ފައިސާ ދައްކައި ނިންމުމަށް މަސައްކަތްކުރައްވަމުން ގެންދަވާ ކަމަށެވެ.
ރައީސް ވިދާޅުވީ ދޭންޖެހޭ ފައިސާ ހުރި ފުދޭ ވަރަކަށް ގިނަ ފަރާތްތަކަކަށް މި މަސް ނިމޭއިރަށް ދައްކައިލެވޭތޯ ބަލަމުން ގެންދަވާ ކަމަށާއި، ޖެނުއަރީ މަހުތެރޭގައި ބާކީ އެމައުންޓް ވެސް ރޯދަމަހަށް ދާންވާއިރަށް ކުލިއާކޮށްލެވޭތޯ މަސައްކަތް ކުރައްވަމުން ގެންދަވާ ކަމަށެވެ. މީގެ އިތުރުން، ވިޔަފާރިތަކުން މީރާއަށް ދައްކަން އޮތް ފައިސާއަށް ލުއިތަކެއް ގެނެސްދެއްވުމަކީ މިހާރު ވެސް ކުރައްވަމުން އަންނަ ކަމެއް ކަމަށާއި، އެކަން މިހާރަށްވުރެ ފުޅާކޮށް ގިނަ ވިޔަފާރިތަކަށް އެ ލުއި ދެވޭނެ ގޮތެއް ބައްލަވައިދެއްވާނެ ކަމަށްވެސް ރައީސް ވިދާޅުވިއެވެ.
އަމިއްލަ ކުންފުނިތަކަށް ސަރުކާރުން ދޭންޖެހޭ ފައިސާ ދެ ބިލިއަން ރުފިޔާއަށްވުރެ އިތުރުވާއިރު، މި ފައިސާ ނުލިބޭތީ އެތައް ވިޔަފާރިތަކެއް ހުއްޓުމަކާ ހަމައަށް ގޮސްފައިވާ ކަމަށް ވިޔަފާރިވެރިން މީގެކުރިން ސޯޝަލް މީޑިއާގައި ކަންބޮޑުވުން ފާޅުކުރިއެވެ.
ކޮމެންޓު ފޮނުވާ