ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވިދާޅުވެފައިވާ ގޮތުގައި، ދަންވަރު މާލޭގެ އާންމު ތަންތަނުގައި އުޅޭ ބިދޭސީންނާ ޗެކްކުރުމުގެ ޚާއްޞަ އޮޕަރޭޝަނެއް މިރޭ ފަށާނެއެވެ. މީސްމީޑިއާ މެދުވެރިކޮށް ރައީސް އާންމުކުރެއްވި މެސެޖުގައި ވިދާޅުވީ، ރޭގަނޑު ދަންވަރު ވަގުތުތަކުގައި ބައެއް ބިދޭސީން އާންމު މަސްލަހަތު ގެއްލޭ ކަންކަން ކުރަމުންދާތީ މުޖުތަމައު ރައްކާތެރިކުރުމަށް މި ފިޔަވަޅު އަޅަން ނިންމެވިކަމަށެވެ.
މިރޭ ފެށިގެން ކޮންމެ ރެއަކު ރޭގަނޑު 12:00 އިން ފެށިގެން ހެނދުނު 06:00 އާ ހަމައަށް މަގުމަތީގައާއި އާންމު ތަންތަނުގައި އުޅޭ ބިދޭސީން ފުލުހުންނާއި ކަމާބެހޭ އިދާރާތަކުން ހުއްޓުވައި ސުވާލުކުރާނެއެވެ. ފާހަގަވާ ކަންކަމާ ގުޅިގެން ޤާނޫނީ ފިޔަވަޅުތައް އަޅަން ޖެހޭނަމަ އެ ފިޔަވަޅުތައް އެޅުމަށް ވެސް ދަންނަވާފައިވާ ކަމަށް ރައީސް ހާމަކުރެއްވިއެވެ.
ރާއްޖޭގައި ދިރިއުޅޭ ބިދޭސީންގެ ފަރާތުން ކުށްކުރުން އިތުރުވެފައިވާއިރު، ރޭގަނޑު ދަންވަރު ސައިކަލް އަޑުގަދަކޮށް ބާރު ސްޕީޑްގައި ދުއްވުމާއި، ބިދޭސީންގެ ގްރޫޕްތަކުގެ މެދުގައި ހަމަނުޖެހުންތައް ހިންގުމާއި އިޖްތިމާޢީ މިންގަނޑުތަކާ ޚިލާފަށް އަމަލުކުރުމަކީ ވެސް އާންމުވެފައިވާ ކަންކަމެވެ. މި ޚާއްޞަ އޮޕަރޭޝަނަކީ އެފަދަ މައްސަލަތަކަށް ހައްލު ހޯދުމަށް ސަރުކާރުން ނިންމެވި މުހިއްމު ފިޔަވަޅެއް ކަމުގައި ފާހަގަކުރެވެއެވެ.
ކޮމެންޓު ފޮނުވާ