ހުޅުމާލެ ފޭސް 2 ގެ ހިޔާ 12 ވަނަ ޓަވަރުގައި ހަށިވިއްކުމާއި މަސްތުވާތަކެތީގެ ވިޔަފާރި ކުރަމުންދިޔަ ދިވެހި ފިރިހެނަކާއި އުޒްބެކިސްތާނުގެ ހަތަރު އަންހެނުން މިދިޔަ ހޮނިހިރު ދުވަހުގެ ރޭ ފުލުހުން ހައްޔަރުކޮށްފި އެވެ.
ފުލުހުން ބުނީ ބިދޭސީ އަންހެނުން ރާއްޖެ ގެނެސް ފައިސާ އަށް ހަށިވިއްކުވާ ކަމުގެ މައުލޫމާތު ލިބިގެން ހިންގި އެ އޮޕަރޭޝަނުގައި ހައްޔަރުކުރީ ރ. ރަސްގެތީމު ކިއުބާ، ހުސައިން ސޮލާހު، 40، އާއި އުޒްބެކިސްތާނުގެ ހަތަރު އަންހެނުން ކަމަށެވެ. މި ޖަރީމާ ހިންގުމުގައި އިސްކޮށް އުޅުނީ ހުސައިން ސޮލާހާއި އުޒްބެކް އަންހެނެއް ކަމަށްވާ ޒަރީމާ ގުލަމޮވެނާ ޑެޖުރައެވާ ކަމަށް ތުހުމަތުކުރެވެ އެވެ.
އެ އެޕާޓްމަންޓު ބަލައިފާސްކުރިއިރު 19،100 ޑޮލަރާއި 18،000 އަށް ވުރެ ގިނަ ރުފިޔާ ފެނިފައިވެ އެވެ. ކޯޓުން ވަނީ އިސް ދެ މީހުން 10 ދުވަހަށް އަދި އެހެން ތިން އަންހެނުން ފަސް ދުވަހަށް ބަންދުކުރަން އަމުރުކޮށްފަ އެވެ.
މާލެ އާއި ބޮޑެތި އާބާދީތައް ދިރިއުޅޭ ރަށްރަށުގައި މަސާޖު ޕާލާގެ ނަމުގައި ހަށިވިއްކާ ކަމުގެ ތުހުމަތު ބޮޑުވެފައިވާއިރު، އެފަދަ ތަންތަން ހުއްޓުވަން އިމިގްރޭޝަނުން ދަނީ އޮޕަރޭޝަންތައް ހިންގައި ބިދޭސީން ޑީޕޯޓުކުރަމުންނެވެ.
ކޮމެންޓު ފޮނުވާ