ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކުރި ގަރާރެއްގައި، ފުލުހުންގެ އިސް ވެރިންތަކެއް ސަސްޕެންޑުކުރުމަށް ލަފާދީފިއެވެ. މި ގަރާރުގައި ފުލުހުންގެ ކޮމިޝަނަރު އިސްމާއިލް ނަވީން ވެސް ހިމެނެއެވެ. ރައްޔިތުންގެ މަޖިލިހުގެ މާލިއްޔަތު ކޮމިޓީން މިއަދު ފާސްކޮށްފައިވަނީ ޕޮލިސް ކޮމިޝަނަރު އިސްމާއިލް ނަވީނާއި އިތުރު ހަ ފުލުހުންގެ އޮފިސަރަކު ކޮރަޕްޝަންގެ ތުހުމަތުގައި ސަސްޕެންޑްކުރުމަށް ކަމާބެހޭ ފަރާތްތަކަށް ހުށަހެޅުމަށެވެ.
މިރޭ ބޭއްވި ސިއްރު ބައްދަލުވުމެއްގައި މި ނިންމުން ނިންމީ ފުލުހުންގެ ވެލްފެއާ ކުންފުނި ޕޮލްކޯއާއި އެހެނިހެން ކަންކަމާ ގުޅޭ ކޮރަޕްޝަނަށް ތުހުމަތު ކުރެވޭ މައްސަލަތަކަކާ ގުޅިގެންނެވެ. ސަސްޕެންޑްކުރަން ހުށަހަޅަން ނިންމާފައިވަނީ ކޮމިޝަނަރު ނަވީނާއެކު، އެސިސްޓެންޓް ކޮމިޝަނަރުން މޫސާ އަލީ، އަހުމަދު އަބްދުއްރަހްމާން، މުހައްމަދު ރަޝީދު، މުހައްމަދު ބަޝީރު، މުހައްމަދު ދާއޫދު އަދި ސުޕްރިޓެންޑެންޓް އިސްމާއިލް ޝަމީމް އާދަމެވެ.
ނަމަވެސް މިއީ ސީދާ ކޮން ކަހަލަ މައްސަލަތަކެއްގައި ކަމެއް ކޮމިޓީން މިހާތަނަށް ހާމަކޮށްފައެއް ނުވެއެވެ. ކޮމިޓީގެ ރިޕޯޓު މުޅި މަޖިލީހުގައި ނަގާ ވޯޓަކަށް ފަހު ގޮތް ނިންމާނެ އެވެ.
ކޮމެންޓު ފޮނުވާ