ކުރިއަށް އޮތް ކައުންސިލް އިންތިޚާބުގައި ވާދަކުރާ ކެންޑިޑޭޓުންގެ ތެރެއިން ސަރުކާރު ހިންގާ މައި ޕާޓީ އެމްޑީޕީއަށް ނިސްބަތްވާ 3 ކެންޑިޑޭޓަކު އަނެއްކާވެސް ނަން އަނބުރާ ނަގައިފިއެވެ.
އިލެކްޝަން ކޮމިޝަނުން ކޮށްފައިވާ އިއުލާނެއްގައި ބުނެފައިވާގޮތުން ނަން ނެގި އެމްޑީޕީ ކެންޑިޑޭޓުންގެ ތެރޭގައި ހިމެނެނީ ނ. މާފަރު އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ވާދަކުރެއްވި ޢަފާ ޢަބްދުއްރަޙީމާއި، ގއ. ކޮނޑޭ ކައުންސިލްގެ މެންބަރުކަމަށް ވާދަކުރެއްވި ނަޢުފަލް އިބްރާހީމާއި ހއ. ތުރާކުނު ކައުންސިލްގެ އަންހެނުންނަށް ޚާއްޞަކޮށްފައިވާ ގޮނޑިއަށް ވާދަކުރެއްވި ރަޙީމާ ޢަބްދުއްރަޙްމާނެވެ.
މީގެ އިތުރުން ކ. ތުލުސްދޫ ކައުންސިލްގެ މެންބަރުކަމަށް އަމިއްލަގޮތުން ވާދަކުރެއްވި ޢަލީ ވާފިރު ވެސް ވަނީ ނަން އަނބުރާ ގެންގޮސްފައެވެ.
މިއާއިއެކު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވާދަކުރާ ކެންޑިޑޭޓުންގެ ތެރެއިން ނަން އަނބުރާ ގެންގޮސްފައިވާ އެމްޑީޕީގެ ކެންޑިޑޭޓުންގެ އަދަދުވަނީ 34 އަށް އަރާފައެވެ. އަދި ކައުންސިލް އިންތިހާބުގައި ވާދަކުރާ ކެންޑިޑޭޓުންގެ ތެރެއިން މިހާތަނަށް ނަން ނެގި އެމްޑީޕީ ކެންޑިޑޭޓުންގެ އަދަދުވަނީ 27 އަށް އަރާފައެވެ.
ރާއްޖޭގައި އިއުލާންކޮށްފައިވާ ޞިއްޚީ ކުއްލި ނުރައްކަލުގެ ހާލަތާއިއެކު އިންތިޚާބް ބޭއްވޭނެ ގޮތަކާއިމެދު ސުވާލު އުފެދިފައިވާ މި ދަނޑިވަޅުގައި އިންތިހާބު ލަސްވަމުން ދިއުމުން ގިނަ އަދަދެއްގެ ކެނޑިޑޭޓުން އަންނަނީ ނަން އަނބުރާ ގެންދަމުންނެވެ. ނަމަވެސް އިލެކްޝަންސް ކޮމިޝަނުން މިހާރުވަނީ އޭޕްރީލް މަހުގެ 3 ވަނަ ދުވަހު އިންތިހާބު ބޭއްވުމަށް ނިންމާފައެވެ.
