މާލޭގައި މިރޭ އެމްޑީޕީން ކުރިއަށް ގެންދިޔަ ބޮޑު މުޒާހަރާގެ އެންމެ ކުރީ ސަފުގައި ކުރީގެ ރައީސް އިބްރާހީމް މުހައްމަދު ސޯލިހު ހުންނަވައިގެން، ސަރުކާރު ހިއްސާވާ ކުންފުނިތަކުގެ ކޮރަޕްޝަންއާއި ގާނޫނުއަސާސީއަށް ގެނެސްފައިވާ ބަދަލުތަކާ ދެކޮޅަށް އަޑުއުފުލާއިފިއެވެ.
އާޓީފިޝަލް ބީޗު ސަރަހައްދު ފުރިގެން ގޮސްފައިވާ މި މުޒާހަރާގައި ރައީސް އިބޫގެ އިތުރުން، އެމަނިކުފާނުގެ ނައިބު ރައީސް ފައިސަލް ނަސީމް، އެމްޑީޕީ ޗެއާޕާސަން ފައްޔާޒު އިސްމާއިލް އަދި ޕާޓީގެ ރައީސް އަބްދުﷲ ޝާހިދު އާއި އިސް ލީޑަރުންތަކެއް ބައިވެރިވެ ވަޑައިގެންނެވިއެވެ. މުޒާހަރާގައި ބައިވެރިވުމަށް ރާއްޖޭގެ އެކި ކަންކޮޅުތަކުން ގިނަ ބަޔަކު މާލެ އައިސްފައިވާ ކަމަށް ރިޕޯޓްތައް ބުނެއެވެ.
ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު މުޒާހަރާގެ ބައިވެރިންގެ ފަރާތުން ސަރުކާރަށް ހުށަހެޅި ފަސް ޑިމާންޑެއްގެ ތެރޭގައި، ރައްޔިތުންގެ މަޖިލީހުގެ މެންބަރުންގެ ހައްގުތައް ހިފެހެއްޓޭ ގޮތަށް ގާނޫނުއަސާސީއަށް ގެނެސްފައިވާ ބަދަލުތައް މާދަމާ ބާއްވާ ޖަލްސާއަކުން އުވާލުމާއި، ސަރުކާރު ކުންފުނިތަކުގައި ހިނގާ ކޮރަޕްޝަން ހުއްޓުވައި، ދިވެހި ވިޔަފާރިތަކަށް ދަރާފައިވާ ފައިސާ ފަސް ހަފުތާ ތެރޭގައި ދެއްކުން ހިމެނެއެވެ.
މީގެ އިތުރުން ލާމަރުކަޒީ ނިޒާމަށް ގެނެސްފައިވާ ބަދަލުތައް އުވާލުމާއި، ހިޔާލުފާޅުކުރުމުގެ މިނިވަންކަމަށް ހުރަސް އެޅޭ ގޮތަށް މީޑިއާ ކޮންޓްރޯލްކުރުމަށް ހެދިފައިވާ ގާނޫނު ބާޠިލުކުރުމާއި، ރައްކާތެރި ބޭސްތަކާއި އާސަންދަގެ ޚިދުމަތް ކުރީގެ ސަރުކާރުގައި ލިބެމުން ދިޔަ ފެންވަރުގައި ފޯރުކޮށްދިނުމަށް އެމްޑީޕީން ގޮވާލާފައިވެއެވެ.
އެއްވުން ކުރިއަށްދަނިކޮށް، ހުއްދަ ދީފައިވާ ރޫޓާ ޚިލާފަށް މަޖީދީމަގުން މުޒާހަރާ ކުރިއަށް ގެންދިޔުމާ ގުޅިގެން، ފުލުހުން ވަނީ ތަކުރާރުކޮށް ނަސޭހަތް ދީ، ގާނޫނީ ފިޔަވަޅު އެޅުމުގެ އިންޒާރު ދީފައެވެ. ހޯމް މިނިސްޓަރު އަލީ އިހުސާން އެކްސް (ކުރީގެ ޓުވިޓަރ) ގައި ކުރެއްވި ޕޯސްޓެއްގައި ވިދާޅުވީ، މުޒާހަރާގެ ބައިވެރިއަކު ޑިއުޓީގައި ތިބި ފުލުހެއްގެ ޝީލްޑް ގަދަކަމުން ނަގަން މަސައްކަތް ކުރުމުން، މިއީ ސުލްހަވެރި ސިޔާސީ ހަރަކާތެއް ކަމަށް ނުބެލެވޭނެ ކަމަށެވެ.
އެމްޑީޕީން ބުނެފައިވަނީ މި މުޒާހަރާގެ މައިގަނޑު މަޤްޞަދަކީ ސަރުކާރަށް ތުހުމަތުކުރެވޭ ކޮރަޕްޝަންގެ މައްސަލަތަކާ ދެކޮޅަށް އަޑުއުފުލުމާއި، ރައްޔިތުންގެ ކަންބޮޑުވުންތައް ސަރުކާރުގެ ސަމާލުކަމަށް ގެނައުން ކަމަށެވެ.
ކޮމެންޓު ފޮނުވާ