އެމެރިކާގެ ރައީސް ޑޮނަލްޑް ޓްރަމްޕް ވަނީ ގާޒާގައި ދިގުލައިގެން ކުރިއަށްދާ ހަނގުރާމަ ނިންމާލުމަށް 20 ނުކުތާ ހިމެނޭ "ދާއިމީ ސުލްހަ" ޕްލޭނެއް ހުށަހަޅުއްވާފައެވެ. ވައިޓް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޓްރަމްޕް ވިދާޅުވީ މިއީ ތާރީހީ ދުވަހެއް ކަމަށާއި، ހަނގުރާމަ ނިމުމަކަށް ގެނައުމާ ވަރަށް ކައިރިވެފައިވާ ކަމަށެވެ.
ރައީސް ޓްރަމްޕް ހާމަކުރެއްވި ގޮތުގައި މި ޕްލޭން އެކުލަވާލުމުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ މަޝްވަރާކުރެއްވި ކަމަށާއި، ހަމާސް ފިޔަވައި ދެކޮޅުގެ ހުރިހާ ފަރާތްތަކުން ވެސް މި ހުށަހެޅުމަށް ތާއީދުކޮށްފައިވާ ކަމަށެވެ. "މިއީ ގިނަ ބަޔަކު އުއްމީދުކުރި މިންވަރަށްވުރެ ބޮޑު ކާމިޔާބީއެއް. އާ މެދުއިރުމަތީގެ ވައުދު އަޅުގަނޑުމެންނަށް ވަރަށް ސާފުކޮށް ފެންނަމުންދޭ" ޓްރަމްޕް ވިދާޅުވިއެވެ.
ނަމަވެސް ހަމާސްގެ އިސް އޮފިޝަލަކު އަލްޖަޒީރާއާ ވާހަކަދައްކަމުން ބުނެފައިވަނީ، ޓްރަމްޕްގެ ޕްލޭން އަދި އެ ޖަމާއަތަށް ރަސްމީކޮށް ލިބިފައިނުވާ ކަމަށެވެ. ޓްރަމްޕް އިތުރަށް ވިދާޅުވީ، ހަމާސް މި ޕްލޭނަށް ރުހުން ނުދީފިނަމަ، އިސްރާއީލުން އެ ޖަމާއަތާ ދެކޮޅަށް ކުރާ ކަންކަމަށް އެމެރިކާއިން ފުރިހަމަ އެއްބާރުލުންދޭނެ ކަމަށެވެ.
މި ސުލްހަ ޕްލޭންގެ މައިގަނޑު ނުކުތާތަކުގެ ތެރޭގައި އިސްރާއީލުން ގާޒާ ނުހިފުމާއި، ގާޒާގެ އެއްވެސް މީހަކު ފައިބަން މަޖުބޫރު ނުކުރުން ހިމެނެއެވެ. އަދި 72 ގަޑިއިރުގެ ތެރޭގައި އިސްރާއީލުގެ ހުރިހާ އަސީރުން ދޫކޮށްލުމާއި، އިސްރާއީލުން ބަންދުކޮށްފައިތިބި ގާޒާގެ 1700 މީހުންނާއި، އިސްރާއީލު ޖަލުތަކުގައި އުމުރަށް ޖަލާފައިތިބި ފަލަސްތީނުގެ 250 މީހުން ދޫކޮށްލުން ވެސް ހިމެނެއެވެ.
މީގެ އިތުރުން، ފަލަސްތީން އޮތޯރިޓީ އިސްލާހުކޮށް ފަލަސްތީނުގެ އަމިއްލަ ދައުލަތެއް އުފެއްދުމުގެ މަޝްވަރާތައް ފެށުމާއި، އެމެރިކާއިން މި މަޝްވަރާގެ ނިންމުން ބަލައިގަތުން ވެސް ޕްލޭންގައި ހިމެނެއެވެ. ގާޒާއަށް ވަގުތުން އިންސާނީ އެހީތެރިކަން ފޯރުކޮށްދިނުމާއި، އދ.އިން ސުޕަވައިޒްކުރާ، އަވައްޓެރި މުސްލިމް ދައުލަތްތަކުން އެކުލެވޭ "އިންޓަނޭޝަނަލް ސްޓެބިލިޓީ ފޯސް" އެއް ގާއިމްކުރުން ވެސް ހުށަހެޅިފައިވެއެވެ. ހަމައެއާއެކު، ހަނގުރާމައިގެ ސަބަބުން ގާޒާގެ އާންމުންނަށް ވެފައިވާ ގެއްލުންތަކުން އަރައިގަތުމަށް އެހީވެ، ގާޒާ އަލުން ބިނާކުރުމުގެ މަސައްކަތްތައް ކުރުން ވެސް ޕްލޭންގައި ހިމެނެއެވެ.
އަލްޖަޒީރާގެ ޑިޕްލޮމެޓިކް އެޑިޓަރު ޖޭމްސް ބޭސް ފާހަގަކުރެއްވި ގޮތުގައި، އިސްރާއީލުން މި ހުށަހެޅުންތަކަށް އެއްބަސްވާއިރު، މިހާރު އުފެދޭ މުހިންމު ސުވާލަކީ ހަމާސްއިން މި ހުށަހެޅުން ގަބޫލުކުރާނެތޯއެވެ. ހަމާސް އެދޭނަމަ މި ހުށަހެޅުން ތަންފީޒުކުރުމުގައި ގަތަރުން މުހިންމު ދައުރެއް އަދާކުރާނެ ކަމަށް ވެސް ބޭސް ވިދާޅުވިއެވެ.
އދ.ގެ އާންމު މަޖިލިސް މި ހަފްތާގައި ފަށާއިރު، އިތުރު ގައުމުތަކުން ފަލަސްތީނުގެ ދައުލަތް ބަލައިގަނެ އިއުލާނުކުރާނެ ކަމަށް ބެލެވެއެވެ. އދ.ގެ މެންބަރު 193 ގައުމުގެ ތެރެއިން 75 ޕަސެންޓަކީ މިހާރުވެސް ފަލަސްތީނުގެ ދައުލަތް ގަބޫލުކުރާ ގައުމުތަކެވެ.
2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން އިސްރާއީލުން ގާޒާގައި 65,600 އަށްވުރެ ގިނަ މީހުން މަރާލައިފައިވާއިރު، ފާއިތުވި 24 ގަޑިއިރުގެ ތެރޭގައި ވެސް ގާޒާގެ އެކި ސަރަޙައްދުތަކުގައި ފަލަސްތީނުގެ 50 ރައްޔިތުން މަރުވެފައިވެއެވެ.
ގާޒާގެ ބޮޑު ސަރަހައްދަކަށް ހައިހޫނުކަން ފެތުރިފައިވާތީ، އެހީ ފޯރުކޮށްދެވޭނެ ގޮތް ވަގުތުން ހަމަޖެއްސުމަށް 100 އަށްވުރެ ގިނަ ޖަމިއްޔާއިން ގޮވާލައިފައިވެއެވެ. ނަމަވެސް އިސްރާއީލުން ބުނަނީ އެ ހައިހޫނުކަމަކީ ހަމާސްގެ އުފެއްދުމެއް ކަމަށެވެ.
ކޮމެންޓު ފޮނުވާ