އޮޑިޓަރ ޖެނެރަލްގެ އޮފީހުން ރޭ އާންމުކުރި ފެނަކަ ކޯޕަރޭޝަންގެ އޮޑިޓް ރިޕޯޓުން ކޮރަޕްޝަންގެ ބޮޑެތި މައްސަލަތަކެއް ފެންމަތިވެްއޖެއެވެ. އެ ކުންފުނީގެ ކުރީގެ މެނޭޖިން ޑިރެކްޓަރު މުހައްމަދު ސައީދުގެ ދައުރުގައި ފެނަކައިން 439 އެއްބަސްވުމެއް ބިޑަށް ހުޅުވައިނުލާ ހަދާފައިވާކަމާއި، މި އެއްބަސްވުންތަކުގެ ޖުމުލަ އަގު 1.4 ބިލިއަން ރުފިޔާއަށް އަރާކަން ރިޕޯޓުން ހާމަވެފައިވެއެވެ.
2021 އިން 2023 އަށް ފެނަކައިން ޖުމުލަ 674 އެއްބަސްވުމެއްގެ ދަށުން 2.2 ބިލިއަން ރުފިޔާގެ މަސައްކަތް އެކި ފަރާތްތަކާ ހަވާލުކޮށްފައިވާއިރު، މީގެ ބޮޑު ބައެއް ހަދާފައިވަނީ ގަވާއިދާ ހިލާފަށް ކަމަށް ރިޕޯޓުން ދައްކައެވެ. އެމްޑީޕީ ސަރުކާރު ވެރިކަމާ ހަވާލުވިއިރު ފެނަކައިގެ ޖުމުލަ ދަރަނި 769 މިލިއަން ރުފިޔާގައި ހުރި ނަމަވެސް، އެ ވެރިކަން ނިމުނުއިރު ދަރަނި ވަނީ 3.9 ބިލިއަން ރުފިޔާއަށް އިތުރުވެފައެވެ.
ބިޑަށް ނުހުޅުވާ ހެދި އެއްބަސްވުންތަކުގެ ތަފުސީލަށް ބަލާއިރު، ކަރަންޓު ކޭބަލް ގަތުމަށް 294 އެއްބަސްވުމެއް ހަދާފައިވާއިރު އޭގެ އަގަކީ 544 މިލިއަން ރުފިޔާއެވެ. ޖަނަރޭޓަރު ސެޓު ގަތުމަށް 82 އެއްބަސްވުމެއް ހަދާފައިވާއިރު އޭގެ އަގަކީ 259 މިލިއަން ރުފިޔާއެވެ. ޓްރާންސްފޯމަރު ގަތުމަށް 33 އެއްބަސްވުމެއްގައި 76 މިލިއަން ރުފިޔާ ހަރަދުކޮށްފައިވާއިރު، ފެނާއި ނަރުދަމާގެ މަޝްރޫއުތަކަށް 29 އެއްބަސްވުމެއްގައި 491 މިލިއަން ރުފިޔާ ހަރަދުކޮށްފައިވެއެވެ.
ވަރަށް ބޮޑު ކަންބޮޑުވުމެއް އުފެދޭ ކަމަކީ، ރާއްޖެއިން ބޭރުން ޖަނަރޭޓަރާއި ކޭބަލް އަދި ޓްރާންސްފޯމަރު ގެނައުމުގައި ސަޕްލަޔަރުންނަށް ދީފައިވަނީ އެ ތަކެތީގެ އަސްލު އަގަށްވުރެ ވަރަށް ބޮޑު އަދަދުތަކެއް ކަމެވެ. ރިޕޯޓުގައި ފާހަގަކޮށްފައިވާ ގޮތުން، ސަޕްލަޔަރުން ފެނަކައަށް ތަކެތި ވިއްކާފައިވަނީ 40 ޕަސެންޓާއި 55 ޕަސެންޓާ ދެމެދުގެ ބޮޑު ފައިދާއެއް ނަގައިގެންނެވެ. އަދި އާ ޖަނަރޭޓަރުތަކުގެ ނަމުގައި ގެނެސްފައި ހުރީ މަރާމާތުކޮށްފައިވާ ބާ ޖަނަރޭޓަރުތައް ކަމަށްވެސް ރިޕޯޓުގައި ބުނެފައިވެއެވެ.
ރަށްރަށުގައި އިންޖީނުގެ އެޅުމާއި އޮފީސް އެޅުމުގެ 57 މަޝްރޫއެއް ފެނަކައިން ކުރިއަށް ގެންދިޔައިރު، 2024 ގެ ނިޔަލަށް މީގެ ތެރެއިން 41 މަޝްރޫއެއް ނިމިފައި ނުވި ނަމަވެސް އެކަމަށް 1.06 ބިލިއަން ރުފިޔާ ދޫކޮށްފައިވެއެވެ. މި މަޝްރޫއުތައް ނިންމަން މާކެޓު ރޭޓުގެ ބޭރުން އިތުރަށް 241 މިލިއަން ރުފިޔާ ހަރަދުވާނެ ކަމަށް އޮޑިޓަރުން ލަފާކުރާއިރު، ޖުމުލަ 57 މަޝްރޫއަށް މާކެޓު އަގަށްވުރެ އިތުރަށް 767 މިލިއަން ރުފިޔާ ހަރަދުވާނެ ކަމަށް ބެލެވެއެވެ.
މުދާ އުފުލުމަށް ދޯންޏާއި ލޭންޑިން ކްރާފްޓް ކުއްޔަށް ހިފުމުގައިވެސް ފެނަކައިން އަމަލުކޮށްފައިވަނީ މާކެޓު އަގަށްވުރެ ވަރަށް ބޮޑު އަގުތަކެއްގައެވެ. މިސާލަކަށް މާލެއިން އައްޑޫ ސިޓީ ހިތަދުއަށް މުދާ ގެންދިއުމަށް 495,000 ރުފިޔާއަށް ދޯންޏެއް ކުއްޔަށް ހިފާފައިވާއިރު، މާކެޓު ރޭޓަކީ 90,000 ރުފިޔާއާއި 140,000 ރުފިޔާ ދެމެދެވެ. ތިނަދުއަށް މުދާ ގެންދިއުމަށް 450,000 ރުފިޔާއަށް ދޯންޏެއް ކުއްޔަށް ހިފާފައިވާއިރު، މާކެޓު އަގަކީ 80,000 ރުފިޔާއާއި 120,000 ރުފިޔާ ދެމެދެވެ. ތިން އަހަރުގެ ތެރޭގައި މުދާ އުފުލުމަށް ހެދި 612 އެއްބަސްވުމުގެ ތެރެއިން 344 އެއްބަސްވުމަކީ މާކެޓު އަގަށްވުރެ ބޮޑު އަގުތަކެއްގައި ހެދި އެއްބަސްވުންތަކެއް ކަމަށާއި، މިކަމުގެ ސަބަބުން މާކެޓު އަގަށްވުރެ އިތުރަށް 47.6 މިލިއަން ރުފިޔާ ދޫކޮށްފައިވާކަން ރިޕޯޓުން ހާމަވެއެވެ.
އެކި ރަށްރަށުން ތަންތަން ކުއްޔަށް ހިފުމުގައިވެސް ފެނަކައިން އަމަލުކޮށްފައިވަނީ އުސޫލާ ހިލާފަށް ކަމަށާއި، އެ ތަންތަން ކުއްޔަށް ހިފީ އެންމެ ފަރާތަކުން އަގު ހޯދައިގެން ކަމަށާއި، އެ ތަންތަނުގެ ކުއްޔަށާއި މަރާމާތަށް 12.1 މިލިޔަން ރުފިޔާ ހަރަދުކޮށްފައިވާކަން ރިޕޯޓުން ހާމަވެއެވެ.
ފެނަކައިގެ ކޮރަޕްޝަންގައި މެނޭޖިން ޑިރެކްޓަރަކަށް އޭރު ހުންނެވި މުހައްމަދު ސައީދުގެ އިހުމާލާއި ހިއްސާ އޮތްކަން ރިޕޯޓުން ވަރަށް ބޮޑަށް ފާހަގަވާއިރު، އޮޑިޓަރ ޖެނެރަލް ހުށަހަޅުއްވާފައިވަނީ އެ ކަންކަމުގައި ޒިންމާވާ ފަރާތްތަކުގެ މައްސަލަތައް ތަހުގީގުކޮށް ފިޔަވަޅު އެޅުމަށެވެ. ފެނަކައިން ފައިސާ ހަރަދުކުރި ގާތްގަނޑަކަށް ހުރިހާ ދާއިރާއެއްގައިވެސް ކޮރަޕްޝަނުގެ ތެރެއިން އެތައް ސަތޭކަ މިލިޔަން ރުފިޔާއެއް ގެއްލިފައިވާކަން މި ރިޕޯޓުން އެނގެއެވެ.
ކޮމެންޓު ފޮނުވާ