ބްރެޒިލްގެ ކުރީގެ ރައީސް ޖައިރ ބޯލްސޮނާރޯއަށް 27 އަހަރާއި 3 މަސްދުވަހަށް ޖަލަށް ލާން ހުކުމް ކޮށްފިއެވެ. މިއީ އެގައުމުގެ ސުޕްރީމް ކޯޓުގެ ޕެނަލެއްގެ އަޣުލަބިއްޔަތުން، މިލިޓަރީ ބަޣާވާތެއް ކުރަން މަސައްކަތްކުރި ކުށުގައި އޭނާ ކުށްވެރިވާކަމަށް ވޯޓު ދިނުމަށްފަހު ކަނޑައެޅި ޙުކުމެކެވެ.
ބުރާސްފަތި ދުވަހު، ފަސް ފަނޑިޔާރުންގެ ތެރެއިން ހަތަރު ފަނޑިޔާރުން، 2022 ވަނަ އަހަރުގެ އިންތިޚާބުގައި ރައީސް ލުއިޒް އިނާސިއޯ ލޫލާ ދަ ސިލްވާއާއި ވާދަކޮށް ބަލިވުމަށްފަހު، ޤާނޫނާ ޚިލާފަށް ވެރިކަމުގައި ދެމިތިބުމަށް މަސައްކަތްކުރި ކުށުގައި ބޯލްސޮނާރޯ ކުށްވެރިކޮށްފައިވެއެވެ.
ފަނޑިޔާރު ކާމެން ލޫސިއާ ވިދާޅުވީ، ބޯލްސޮނާރޯ "ޑިމޮކްރަސީއާއި މުއައްސަސާތައް ނައްތާލުމުގެ މަޤުޞަދުގައި" ޢަމަލުކުރިކަމުގެ އެކަށީގެންވާ ހެކި އެބަހުރި ކަމަށެވެ. އެހެންނަމަވެސް ފަސްވަނަ ފަނޑިޔާރު ލުއިޒް ފަކްސް، ބުދަ ދުވަހު، 70 އަހަރުގެ ކުރީގެ ރައީސް ހުރިހާ ތުހުމަތަކުން ބަރީޢަކުރުމަށް ވޯޓު ދިނެވެ. މިހާރު ގޭގައި ބަންދުކޮށްފައި ހުރި ބޯލްސޮނާރޯއަށް، ލޫލާގެ ވެރިކަން ވައްޓާލުމަށް "ކްރިމިނަލް އޯގަނައިޒޭޝަނެއް"ގައި އިސްކޮށް ހަރަކާތްތެރިވިކަމުގެ ކުށް ހިމެނޭގޮތުން، ފަސް ތުހުމަތެއްގައި ކުށްވެރިވުމުން 40 އަހަރާ ހަމައަށް ޖަލު ޙުކުމެއް ކުރެވިދާނެއެވެ. އެކަމަކު، 5 ވަނަ ފަނޑިޔާރުގެ ވޯޓުގެ ސަބަބުން މި ޙުކުމަށް ޗެލެންޖު ކުރެވިދާނެއެވެ.
ބްރެޒިލްގެ އިލެކްޓްރޯނިކް ވޯޓިންގ ނިޒާމާ ބެހޭގޮތުން އަސާސެއްނެތް ތުހުމަތުތައް ފެތުރުމުގެ ސަބަބުން، ބްރެޒިލްގެ އެންމެ މަތީ އިންތިޚާބީ ކޯޓުން 2030 އަށް އިންތިޚާބުތަކުގައި ވާދަކުރުން މަނާކޮށްފައިވީ ނަމަވެސް، ބޯލްސޮނާރޯ ބުނަމުން އަންނަނީ 2026 ގައި ރިޔާސީ އިންތިޚާބުގައި ވާދަކުރާނެ ކަމަށެވެ.
ސުޕްރީމް ކޯޓުންވަނީ ބޯލްސޮނާރޯއާއެކު ދައުވަކުރެވުނު ހަތް ބައިވެރިން ވެސް ކުށްވެރި ވާކަމަށް ނިންމާފައެވެ. އޭގެ ތެރޭގައި: ކުރީގެ ޑިފެންސް މިނިސްޓަރާއި ބޯލްސޮނާރޯގެ 2022 ރަނިންގ މޭޓް ވޯލްޓަރ ބްރާގާ ނެޓޯ؛ ކުރީގެ ޑިފެންސް މިނިސްޓަރ ޕައުލޯ ސެރްޖިއޯ ނޮގުއެއިރާ؛ ބޯލްސޮނާރޯގެ ކުރީގެ އެއިޑް-ޑި-ކޭމްޕް މައުރޯ ސިޑް؛ އޭނާގެ މިލިޓަރީ އެޑްވައިޒަރ އޮގަސްޓޯ ހެލެނޯ ރިބެއިރޯ؛ ކުރީގެ ޖަސްޓިސް މިނިސްޓަރ އެންޑަރސަން ޓޮރެސް؛ ކުރީގެ ނޭވަލް ޗީފް އަލްމިރ ގާނިއަރ ސާންޓޮސް؛ އަދި ކުރީގެ ފުލުހުންގެ އޮފިސަރ އެލެކްޒެންޑަރ ރަމާގެމް ހިމެނެއެވެ.
ކޮމެންޓު ފޮނުވާ