ދުނިޔޭގެ ޕޯސްޓް ދުވަސް ފާހަގަކުރާ މި ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ރާއްޖޭގެ ޕޯސްޓް ޚިދުމަތުން ޤައުމީ ތަރައްޤީއަށް ކޮށްދިން މުހިންމު ދައުރު ފާހަގަ ކުރައްވައިފިއެވެ.
އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި ރައީސް ފާހަގަކުރެއްވީ، ވޭތުވެދިޔަ 119 އަހަރު ދުވަހުގެ ތެރޭގައި ދިވެހިރާއްޖޭގެ މުޚާބަރާތާއި އިޤްތިޞާދީ ކުރިއެރުމަށް ޕޯސްޓް ޚިދުމަތުން ކޮށްދިން ބޭނުންތެރި މަސައްކަތްތަކެވެ. މީގެ އިތުރުން ޕޯސްޓް ޚިދުމަތް ދިނުމުގައި އިސްނަގައިގެން މަސައްކަތް ކުރި ވެރިންނާއި މުވައްޒަފުންނަށް ޤައުމު ފަޚުރުވެރިވާކަން ރައީސް ވިދާޅުވިއެވެ. ޕޯސްޓް ޚިދުމަތުގެ މިހާރުގެ ޓީމަށްވެސް އަހަރީ ދުވަހުގެ ތަހުނިޔާ ރައީސް އިތުރަށް ދެންނެވިއެވެ.
ދިވެހިރާއްޖޭގައި ޕޯސްޓް ޚިދުމަތް ފެށިގެން އައީ 1906 ވަނަ އަހަރު، ރާއްޖެ ޔުނިވަރސަލް ޕޯސްޓަލް ޔޫނިއަންގެ މެންބަރަކަށް ވުމާ އެކުގައެވެ. އޭރު މާލޭގައި ޤާއިމްކުރެވުނު ކުޑަ އޮފީހަކުން ފެށިގެން، މައިގަނޑުގޮތެއްގައި ސިލޯނާއި އިންޑިޔާއާ ދެމެދު ރަސްމީ މުޢާމަލާތްތައް ބެލެހެއްޓުމުގެ މަސައްކަތް ކުރިއެވެ. ހަމަ އެ އަހަރު ތާރީޚީ ގޮތުން މުހިންމު ކަމެއްގެ ގޮތުގައި ރާއްޖޭގެ ފުރަތަމަ ޕޯސްޓް ސްޓޭމްޕް ނެރުނެވެ. މި ސްޓޭމްޕްގައި ދިވެހި ސަގާފަތް ތަމްސީލުކުރާ ބޮއްޔެއްގެ ސިފަ ކުރެހިފައިވެއެވެ.
ޒަމާން ބަދަލުވަމުން އައި އައުމާއެކު، ޕޯސްޓް ޚިދުމަތް ރާއްޖޭގެ އެންމެހައި އަތޮޅުތަކަށް ފުޅާވެ، ރައްޔިތުންނަށް ފަސޭހަކަމާއެކު މި ޚިދުމަތް ލިބެން ފެށިއެވެ. 1994 ވަނަ އަހަރު ސަރުކާރުގެ ސައްތަ އިންސައްތަ ހިއްސާ އޮންނަ ކުންފުންޏެއްގެ ގޮތުގައި މޯލްޑިވްސް ޕޯސްޓް ލިމިޓެޑް އުފެދި، ޒަމާނީ ޓެކްނޮލޮޖީއާ އެކު ޚިދުމަތް ފޯރުކޮށްދޭން ފެށިއެވެ. މި ކުންފުނީގެ އަހަރީ ދުވަހަކީ އޮގަސްޓް 20 އެވެ.
އޮކްޓޯބަރު 9 ގައި ފާހަގަކުރާ ވޯލްޑް ޕޯސްޓް ޑޭ އަކީ 1874 ގައި ސުވިޒަލޭންޑުގައި ޔުނިވަރސަލް ޕޯސްޓަލް ޔޫނިއަން އުފެދުނު ދުވަހެވެ. މި ޖަމްޢިއްޔާ އުފެދުމުން ދުނިޔޭގެ މުވާސަލާތީ ދާއިރާގައި އިންޤިލާބީ ބަދަލުތަކެއް އައެވެ. 1969 ގައި ޖަޕާނުގެ ޓޯކިޔޯގައި ބޭއްވުނު ޔޫޕީޔޫ ކޮންގްރެސްގައި، އިންޑިއާގެ ޝްރީ އާނަންދް މޯހަން ނަރޫލާގެ ހުށަހެޅުމަކަށް، އޮކްޓޯބަރު 9 ވަނީ ރަސްމީކޮށް ވޯލްޑް ޕޯސްޓް ޑޭގެ ގޮތުގައި ކަނޑައަޅައިފައެވެ.
މިއަދު ޑިޖިޓަލް ޒަމާނުގައިވެސް ޕޯސްޓް ޚިދުމަތަކީ ވިޔަފާރިތަކަށާއި އާންމު ރައްޔިތުންނަށް މުހިންމު ޚިދުމަތެއްގެ ގޮތުގައި ދެމިތިބެ، ރާއްޖޭގެ އިޤްތިޞާދީ ހަރަކާތްތަކަށް އެހީތެރިވަމުން ދާ ޚިދުމަތެކެވެ.
ކޮމެންޓު ފޮނުވާ