ރާއްޖޭގައި ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަތައް ހައްލުކުރުމަށް ސަރުކާރުން ކުރަމުންދާ މަސައްކަތުގެ ދަށުން، ބިދޭސީންނާ ގުޅޭ ފީތައް ނުދައްކައިގެން 8900 ފަރާތެއް އެކްސްޕެޓް ސިސްޓަމުން ސަސްޕެންޑްކޮށްފައިވާ ކަމަށް ހޯމް މިނިސްޓްރީން ހާމަކޮށްފިއެވެ.
މިނިސްޓްރީން ބުނި ގޮތުގައި، ވަޒީފާދޭ ފަރާތްތަކަށް ބަޔޯމެޓްރިކްސް އަޕްޑޭޓް ކުރުމަށް ދީފައިވާ އެއް މަސް ދުވަހުގެ މުހުލަތު ހަމަވުމާ ގުޅިގެން، އެކްސްޕެޓް ޕޯޓަލުން މި ފަރާތްތައް ސަސްޕެންޑް ކުރެވިފައިވަނީ ގަވާއިދުތަކާ އެއްގޮތަށް އަމަލުކުރުމަށް ބާރުއެޅުމުގެ ގޮތުންނެވެ.
ބިދޭސީންނާ ގުޅުންހުރި އެކިއެކި ފީތަކުގެ ގޮތުގައި ދައުލަތަށް ލިބެންޖެހޭ 1.7 ބިލިއަން ރުފިޔާގެ ތެރެއިން މިހާތަނަށް 1.2 ބިލިއަން ރުފިޔާ ހޯދިފައިވާ ކަމަށް ހޯމް މިނިސްޓްރީން މައުލޫމާތު ދެއްވިއެވެ. އަދި ބޮޑެތި އަދަދުތަކުން ޖޫރިމަނާ ދައްކަންޖެހިފައިވާ ފަރާތްތަކަށް އިންސްޓޯލްމަންޓް އުސޫލުން ފައިސާ ދެއްކުމުގެ ފުރުސަތު ދިނުމަށްވެސް މިނިސްޓްރީން ނިންމާފައިވާ ކަމަށް ބުންޏެވެ.
ބިދޭސީންގެ މައްސަލަ ހައްލުކުރުމަށް ކުރެވެމުންދާ މަސައްކަތްތަކުގެ ތެރޭގައި، 174,152 ބިދޭސީ މަސައްކަތްތެރިންގެ 10 އިނގިލީގެ ނިޝާން އަދި ފޭޝަލް ރެކޮގްނިޝަން ފޮޓޯ ނަގައި، ޑޭޓާބޭސް އަދާހަމަކޮށްފައިވާ ކަމަށް ހޯމް މިނިސްޓްރީން ފާހަގަކުރެއްވިއެވެ. މިއީ ބިދޭސީން ރެޖިސްޓްރީ ކުރުމުގެ ނިޒާމް ހަރުދަނާ ކުރުމަށް ކުރެވެމުންދާ މަސައްކަތުގެ މުހިންމު ބައެކެވެ.
މި އޮޕަރޭޝަންގެ ދެވަނަ މަރުހަލާގައި ގަވާއިދުން ވަޒީފާ އަދާކުރާ ބިދޭސީންނަށް ގަވާއިދުގެ ތެރެއަށް ވަނުމުގެ ފުރުސަތު ފަހިކުރުމާއި، ބިދޭސީން ރާއްޖެ ގެނައުމުގެ ނިޒާމް އިތުރަށް ހަރުދަނާ ކުރުމުގެ މަސައްކަތްތައް ހިމެނޭ ކަމަށް މިނިސްޓްރީން ބުންޏެވެ. ސަރުކާރުގެ ލަނޑުދަނޑިއަކީ 2027 ވަނަ އަހަރުގެ އޭޕްރީލް މަހުގެ ނިޔަލަށް ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ފުރިހަމައަށް ހައްލުކުރުމެވެ.
ކޮމެންޓު ފޮނުވާ