ވަޒީފާ ދޭ ފަރާތްތަކުން ދައުލަތަށް ނުދައްކާ ހުރި ބިދޭސީންގެ ފީގެ ތެރެއިން ވޯކް ޕާމިޓް ފީގެ ގޮތުގައި 1.2 ބިލިއަން ރުފިޔާ ރިކަވަރ ކުރެވިފައިވާ ކަމަށް ދާހިލީ ވުޒާރާއިން ހާމަކޮށްފިއެވެ.
ރޭ ދައުލަތުގެ މީޑިއާގައި ފެނިގެންދިޔަ ޕްރޮގްރާމެއްގައި ވާހަކަފުޅު ދައްކަވަމުން ދާހިލީ ވުޒާރާގެ ސްޓޭޓް މިނިސްޓަރު އަބްދުލް މަޖީދު އިބްރާހީމް ހާމަކުރެއްވީ، މިހާރުގެ ސަރުކާރު ވެރިކަމާ ހަވާލުވި ވަގުތު ވަޒީފާދޭ ފަރާތްތަކުން ބިދޭސީންގެ ފީގެ ގޮތުގައި ދައުލަތަށް ދައްކަންޖެހޭ 1.6 ބިލިއަން ނުވަތަ 1.7 ބިލިއަން ރުފިޔާ ނުލިބި ހުރި ކަމަށެވެ.
މި ބޮޑު އަދަދުގެ ތެރެއިން މިހާރު ވަނީ ވޯކް ޕާމިޓް ފީގެ ގޮތުގައި 1.2 ބިލިއަން ރުފިޔާ ހޯދުމަށް ކާމިޔާބު ވެފައެވެ. ނަމަވެސް މި އަދަދުގައި ކޯޓާ ފީ، ޖޫރިމަނާ އަދި ސާވިސް ފީ ފަދަ އެހެން ފީތައް ނުހިމެނޭ ކަމަށް މަޖީދު ސާފުކޮށް ދެއްވިއެވެ.
އޮޕަރޭޝަން ކުރަނގީގެ ދަށުން ސަރުކާރުން ކުރިއަށް ގެންދާ މަސައްކަތުގެ ތަފްސީލު ދެއްވަމުން މަޖީދު ފާހަގަކުރެއްވީ، ބިދޭސީންގެ މައުލޫމާތު އެއްކުރުމުގެ މަސައްކަތް ފެށުމަށްފަހު އެއް އަހަރުގެ ތެރޭގައި 160،000 އަށްވުރެ ގިނަ ބިދޭސީންގެ ބަޔޯމެޓްރިކް މައުލޫމާތު ނަގައި ނިމިފައިވާ ކަމަށެވެ.
ބަޔޯމެޓްރިކް މައުލޫމާތު އެއްކުރުމަށް ދީފައިވާ އިތުރު އެއް މަހުގެ މުއްދަތުގައި މި މައުލޫމާތު އަދާހަމަ ނުކުރާ ފަރާތްތަކަށް ޕޯޓަލް މެދުވެރިކޮށް ހިދުމަތް ނުލިބޭ ގޮތަށް ވަނީ ސަސްޕެންޑް ކޮށްފައި ކަމަށް މަޖީދު ވިދާޅުވިއެވެ. މީގެ އިތުރުން ކުރިއަށް އޮތް ތަނުގައި ސަރުކާރުން ދޭ އިރުޝާދުތަކާ އެއްގޮތަށް އަމަލު ނުކުރާ ފަރާތްތަކާ މެދު ގަދަ ފިޔަވަޅުތައް އެޅުމަށް ވަނީ ނިންމާފައި ކަމަށް ވެސް މަޖީދު އިންޒާރު ދެއްވިއެވެ.
ކޮމެންޓު ފޮނުވާ