މީޑިއާތައް ކޮންޓްރޯލް ކުރުމަކީ ޝައުގުވެރިކަން ހުރި ކަމެއް ނޫން ކަމަށާއި، އެއްވެސް އިރެއްގައި މީޑިއާތައް ކޮންޓްރޯލް ނުކުރާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހދ. އަތޮޅަށް ކުރައްވާ ދަތުރުފުޅުގައި ހޯމަ ދުވަހު ނޮޅިވަރަންފަރު ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ވިދާޅުވީ، މީޑިއާ ކޮންޓްރޯލް ކުރުމަކީ މިހާތަނަށް ކޮށްފައިވާ ކަމެއް ނޫން ކަމަށާއި ކުރިއަށް އޮތް ތަނުގައިވެސް ކުރާނެ ކަމެއް ނޫން ކަމަށެވެ.
އަމިއްލަ މެންބަރަކު މީޑިއާ ބިލެއް މަޖިލީހަށް ހުށަހަޅާފައިވާ ކަމަށް މައުލޫމާތު ލިބިފައިވާ ކަމަށް ރައީސް ފާހަގަކުރެއްވިއެވެ. އަދި ސަރުކާރު ޕާޓީ ޕީއެންސީގެ މެންބަރުންނަށް، ރައީސުލްޖުމްހޫރިއްޔާގެ ކޮންޓްރޯލެއް އޮންނަ ގޮތަކަށް މި ބިލު ފާސްކުރާކަށް ބޭނުންނުވާ ކަމަށް ދަންނަވާފައިވާ ކަމަށް ރައީސް ވިދާޅުވިއެވެ.
ހުށަހެޅިފައިވާ ބިލުގައި ރައީސުލްޖުމްހޫރިއްޔާ އައްޔަންކުރާ މެންބަރެއް ކޮމިޝަނުގައި ހިމެނޭ ކަމަށް ބުނެފައި އޮތް ނަމަވެސް، ބިލު ގާނޫނަކަށް ވެއްޖެނަމަ އުފެދޭ ކޮމިޝަންގެ ރައީސަކަށް ހުންނާނީ ކޮމިޝަންގެ މެންބަރުން އިންތިޚާބުކުރާ މީހެއް ކަމަށް ރައީސް ވިދާޅުވިއެވެ. މިގޮތަށް އަމަލުކުރުމަށް ޕީއެންސީ މެންބަރުންނަށް އަންގާފައިވާ ކަމަށްވެސް ރައީސް ފާހަގަކުރެއްވިއެވެ.
މީޑިއާ ވާންޖެހޭނީ މިނިވަންކަމާއެކު އޮޕަރޭޓްކުރާ ތަންތަނަށް ކަމަށް ވިދާޅުވި ރައީސް، މީޑިއާ ރެގިއުލޭޓްކުރުމާއި ބެލެހެއްޓުމުގައި އެމަނިކުފާނުގެ ކޮންޓްރޯލެއް އޮތުމަކީ ބޭނުންވާ ކަމެއް ނޫން ކަމަށް ވިދާޅުވިއެވެ.
މީޑިއާ ރެގިއުލޭޓްކުރަން އެކުލަވާލާ ކޮމިޝަނެއްގައި ރައީސުލްޖުމްހޫރިއްޔާ އައްޔަންކުރާ މެންބަރުން ތިބެންޖެހޭ ސަބަބު ބިލުގައި ސާފުކޮށް ބަޔާންކޮށްފައި ނެތް ނަމަވެސް، ބިލުގައިވާ ގޮތުން ކޮމިޝަންގެ ރައީސް އައްޔަންކުރަން ޖެހެނީ ރައީސުލްޖުމްހޫރިއްޔާއެވެ. އެހެންނަމަވެސް ރައީސް މުޢިއްޒު ވިދާޅުވި ގޮތުގައި، ކޮމިޝަންގެ ރައީސް ހޮވާނީ މެންބަރުންގެ މެދުގައި ނެގޭ ވޯޓަކުންނެވެ.
ކޮމެންޓު ފޮނުވާ