ރައްޔިތުންގެ މަޖިލީހުން މިއަދު ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދު އުއްތަމަ ފަނޑިޔާރުކަމަށް އައްޔަންކުރުމަށް ރުހުންދީފިއެވެ. މަޖިލީހުގެ ވޯޓުގައި ބައިވެރިވި 62 މެންބަރުންގެ ތެރެއިން ހުރިހާ މެންބަރުން އޭނާގެ ނަމަށް ތާއީދުކުރެއްވިއެވެ.
ޖުޑިޝަލް ސާވިސް ކޮމިޝަނުން ހޮނިހިރު ދުވަހު އަބްދުލްޣަނީގެ ނަން އުއްތަމަ ފަނޑިޔާރުކަމަށް ރައީސަށް ލަފާދިނުމަށް ނިންމުމަށްފަހު، އާދީއްތަ ދުވަހު ރައީސް ޑރ. މުޙައްމަދު މުއިއްޒު އޭނާގެ ނަން މަޖިލީހަށް ފޮނުއްވިއެވެ. މަޖިލީހުގެ ޖުޑީޝަރީ ކޮމިޓީން އިއްޔެ އޭނާގެ ނަން ދިރާސާކުރުމަށްފަހު، ވަރަށް އަވަހަށް ރުހުންދޭން ފެންނަކަމަށް ނިންމިއެވެ.
އުއްތަމަ ފަނޑިޔާރުގެ މަގާމަށް އަބްދުލްޣަނީގެ އިތުރުން ކުރިމަތިލެއްވީ ފެމިލީ ކޯޓުގެ ގާޒީ އަބްދުﷲ މުހައްމަދާއި ހައިކޯޓުގެ ކުރީގެ އިސް ފަނޑިޔާރު ޝުޖާއު އުސްމާނެވެ. ޖޭއެސްސީން މި ތިންބޭފުޅުންނާ އިންޓަވިއުކުރި ނަމަވެސް، އަބްދުލްޣަނީގެ ނަން ރައީސަށް ފޮނުވަން ނިންމިއެވެ.
ޓެކްސް އެޕީލް ޓްރައިބިއުނަލްގެ ރައީސްގެ މަގާމުގައި މިހާރު ހުންނަވާ އަބްދުލްޣަނީއަކީ 2000 ވަނަ އަހަރުން ފެށިގެން ޤާނޫނީ ދާއިރާގައި ޚިދުމަތްކުރަމުން އަންނަ ބޭފުޅެކެވެ. މަދަނީ ކޯޓުގެ ގާޒީއަކަށް ހުންނެވުމަށްފަހު ހައިކޯޓުގެ އިސްފަނޑިޔާރުކަން ކުރެއްވިއެވެ. އަދި ޖޭއެސްސީގެ ރައީސްގެ މަގާމު ވެސް ފުރުއްވާފައިވެއެވެ.
2018 ވަނަ އަހަރު އެކެއް ފެބްރުއަރީގެ އަމުރާ ގުޅިގެން އޭރުގެ އުއްތަމަ ފަނޑިޔާރު އަބްދުﷲ ސައީދާއި އަލީ ހަމީދު މުހައްމަދު ވަކިކުރުމަށްފަހު އަބްދުލްޣަނީ ސުޕްރީމް ކޯޓުގެ ފަނޑިޔާރުކަމަށް އައްޔަންކުރެވުނެވެ. އެހެންނަމަވެސް 2019 ވަނަ އަހަރު ސިޔާސީ ހާލަތު ބަދަލުވުމާއެކު ސުޕްރީމް ކޯޓުގެ އެންމެހާ ފަނޑިޔާރުން ވަކިކުރިއިރު އޭނާ ވެސް ހިމެނުނެވެ.
މި މަގާމު ހުސްވީ އެންމެފަހުން އުއްތަމަ ފަނޑިޔާރުކަމުގައި ހުންނެވި އަހުމަދު މުއުތަސިމް އަދުނާން މިދިޔަ މަހު ރިޓަޔާކުރެއްވުމުންނެވެ. އެއަށްފަހު ޖޭއެސްސީން އެ މަގާމަށް ކުރިމަތިލުމަށް ހުޅުވާލައި، މި ތިން ބޭފުޅުން ކުރިމަތިލެއްވުމުން، އެންމެ ގިނަ ތަޖުރިބާ ލިބިފައިވާ ބޭފުޅެއްގެ ގޮތުގައި ހޮވާފައިވަނީ އަބްދުލްޣަނީއެވެ.
ކޮމެންޓު ފޮނުވާ