އުއްތަމަފަނޑިޔާރަކަށް ޣަނީ އައްޔަންކުރަން ކޮމިޓީން ރުހުން ދީފި

އުއްތަމަ ފަނޑިޔާރުގެ މަގާމަށް ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދު އައްޔަންކުރުމަށް ރުހުން ދިނުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ނިންމާއިފިއެވެ. ކޮމިޓީގައި ބައިވެރިވި މެންބަރުންގެ އިއްތިފާގުން މި ނިންމުން ނިންމާފައިވަނީ އޭނާގެ ނަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މަޖިލީހަށް ހުށަހެޅުއްވިތާ އެންމެ ދުވަހެއްގެ ތެރޭގައެވެ.

ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ހުށަހެޅުއްވި މި ހުށަހެޅުމަށް ތިމަރަފުށި ދާއިރާގެ މެންބަރު އަހްމަދު ރިޔާޒް ތާއީދުކުރެއްވުމުން، ކޮމިޓީގައި ބައިވެރިވި ހުރިހާ މެންބަރުން ވެސް އެއްބަސްވެފައިވެއެވެ. މިއީ އުއްތަމަ ފަނޑިޔާރެއް އައްޔަންކުރުމުގައި ކޮމިޓީން މިފަދަ އަވަސް ނިންމުމެއް ނިންމި ފުރަތަމަ ފަހަރެވެ.

ޖުޑިޝަލް ސާވިސް ކޮމިޝަނުން ހޮނިހިރު ދުވަހު ރައީސުލްޖުމްހޫރިއްޔާއަށް ލަފާދެއްވާފައިވަނީ، އުއްތަމަ ފަނޑިޔާރުކަމަށް ކުރިމަތިލެއްވި ތިން ބޭފުޅުންގެ ތެރެއިން އަބްދުލްޣަނީ މުހައްމަދަކީ އެންމެ އެކަށީގެންވާ ފަރާތް ކަމުގައެވެ. އޭނާގެ އިތުރުން މި މަގާމަށް ކުރިމަތިލެއްވި ފެމިލީ ކޯޓުގެ ގާޒީ އަބްދުﷲ މުހައްމަދާއި ހައިކޯޓުގެ ކުރީގެ އިސް ފަނޑިޔާރު ޝުޖާއު އުސްމާނާ ވެސް ޖޭއެސްސީން އިންޓަވިއުކުރެއްވިއެވެ.

އަބްދުލްޣަނީއަކީ ދިވެހިރާއްޖޭގެ ޖުޑީޝަރީގައި 2000 ވަނަ އަހަރުން ފެށިގެން ދިގު މުއްދަތެއް ޚިދުމަތްކުރެއްވި ތަޖުރިބާކާރު ގާނޫނީ ބޭފުޅެކެވެ. މަދަނީ ކޯޓުގެ ގާޒީކަމުން ފެށިގެން ހައިކޯޓުގެ އިސްފަނޑިޔާރުކަމާއި ސުޕްރީމް ކޯޓުގެ ފަނޑިޔާރުކަން ކުރެއްވި އޭނާ، ޖޭއެސްސީގެ ރައީސްކަން ވެސް ކުރައްވާފައިވެއެވެ. މިހާރު އޭނާ ހުންނެވަނީ ޓެކްސް އެޕީލް ޓްރައިބިއުނަލްގެ ރައީސްގެ މަގާމުގައެވެ.

އެކެއް ފެބްރުއަރީގެ ސިޔާސީ ހާދިސާތަކަށްފަހު 2018 ގައި ސުޕްރީމް ކޯޓަށް އައްޔަންކުރެވުނު އަބްދުލްޣަނީ، 2019 ގައި އެމްޑީޕީއަށް މަޖިލީހުގެ އަޣުލަބިއްޔަތު ލިބުމުން ސުޕްރީމް ކޯޓުގެ އެހެން ފަނޑިޔާރުންނާ އެކު ވަކިކުރެވުނެވެ. އެހެންނަމަވެސް އޭނާގެ ގާނޫނީ ތަޖުރިބާއާއި ޢިލްމީ ޤާބިލުކަން ދަމަހައްޓަވައިގެން ގައުމުގެ އެކި ގާނޫނީ މުއައްސަސާތަކުގައި ޚިދުމަތް ކުރައްވަމުން ގެންދެވިއެވެ.

މި މަގާމު ހުސްވެފައިވަނީ އަހުމަދު މުއުތަސިމް އަދުނާން މިދިޔަ ޖުލައި މަހު އުއްތަމަ ފަނޑިޔާރުކަމުން ރިޓަޔާ ކުރެއްވުމުންނެވެ. ޖުޑީޝަރީ ކޮމިޓީގެ ރިޕޯޓު މަޖިލީހުގެ ތަޅުމަށް ހުށަހެޅި ފާސްވުމުން، އަބްދުލްޣަނީ މުހައްމަދު ވާނީ ދިވެހިރާއްޖޭގެ އަލަށް އައްޔަންކުރެވޭ އުއްތަމަ ފަނޑިޔާރެވެ.