ހައިކޯޓުގެ ފަނޑިޔާރުކަމަށް ކުރީގެ ގާޒީ އަބްދުﷲ ޖަމީލް އައްޔަން ކުރައްވައިފި

ރާއްޖޭގެ ހައިކޯޓުގެ ފަނޑިޔާރުކަމަށް ސިވިލް ކޯޓުގެ ކުރީގެ ގާޒީ އަބްދުﷲ ޖަމީލް މޫސާ ރޭ އައްޔަންކޮށްފައިވާ ކަމަށް ޖުޑީޝަލް ސަރވިސް ކޮމިޝަނުން ވިދާޅުވެއްޖެއެވެ.

ސުޕްރީމް ކޯޓުގައި ބޭއްވުނު ހާއްސަ ރަސްމިއްޔާތެއްގައި ފަނޑިޔާރުކަމުގެ ލިޔުން ޖަމީލްއާ ހަވާލުކޮށްދެއްވީ ޖޭއެސްސީގެ ރައީސް ހުސައިން ރިޒާ އާދަމްއެވެ. މި ރަސްމިއްޔާތުގައި ޖަމީލް ވަނީ ހައިކޯޓުގެ ފަނޑިޔާރެއްގެ ގޮތުގައި ހުވާކޮށްފައެވެ.

އަބްދުﷲ ޖަމީލް މޫސާއަކީ ދިގު މުއްދަތަކަށް ޝަރުޢީ ދާއިރާގައި ޚިދުމަތްކުރައްވާފައިވާ ބޭފުޅެކެވެ. އެގޮތުން 2003 ވަނަ އަހަރުން ފެށިގެން 2009 ވަނަ އަހަރާ ހަމައަށް މެޖިސްޓްރޭޓެއްގެ ގޮތުގައި މަސައްކަތްކުރެއްވުމަށްފަހު، 2009 ވަނަ އަހަރުން 2019 ވަނަ އަހަރާ ހަމައަށް ސިވިލް ކޯޓުގެ ގާޒީކަން ކުރައްވާފައިވެއެވެ.

ހައިކޯޓުގެ ފަނޑިޔާރުކަމަށް ޖަމީލްއާއެކު އައްޔަންކުރަން ޖޭއެސްސީން ނިންމާފައިވާ އަނެއް ބޭފުޅަކީ ސަރުކާރުގެ ކުރީގެ ޑެޕިއުޓީ މިނިސްޓަރު މުހައްމަދު ޝަހީދެވެ. ނަމަވެސް ޝަހީދު ވަނީ އެ މަގާމަށް ކުރިމަތިލެއްވުމަށްފަހު އަނބުރާ ނަން ނަގަން އެދިވަޑައިގެންފައެވެ. ފަނޑިޔާރުކަމުގެ ހުވާ ކުރެއްވުމުގެ ރަސްމިއްޔާތު ރެއަށް ތާވަލްކޮށްފައި ވީނަމަވެސް، ޝަހީދު އެ ރަސްމިއްޔާތަށް ވަޑައެއް ނުގަންނަވައެވެ.

ހައިކޯޓުގެ ފަނޑިޔާރުކަމުގެ މި ޚާލީ މަގާމަށް ޖުމްލަ 17 ބޭފުޅުން ކުރިމަތިލެއްވި ކަމަށް ޖޭއެސްސީން މަޢުލޫމާތު ދެއްވާފައިވެއެވެ. މީގެ ތެރެއިން ޝަރުޠު ހަމަވާ ފަރާތްތަކުގެ ތެރެއިން އެންމެ ޤާބިލު ފަރާތެއް ހޮވުމަށް ޖޭއެސްސީން ކުރިޔަށްގެންދިޔަ ޕްރޮސެސްގެ ތެރެއިން ޖަމީލް ހޮވިފައިވަނީ އެ ބޭފުޅާގެ ތަޖުރިބާއާއި ޤާބިލިއްޔަތު ރިޢާޔަތްކޮށްގެން ކަމަށް ވިދާޅުވެއެވެ.