ލޯކަލް ކައުންސިލްތަކުގެ މާލީ ބާރުތައް ހަނިކުރާ ގޮތަށް ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހުތަކަކީ ސިޔާސީ ބޭނުމަށް ނިޒާމު ގަޑުބަޑު ކުރުމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ފުވައްމުލަކު ދެކުނު ދާއިރާގެ މެމްބަރު އިބްރާހިމް ހުސައިން ހުށަހެޅި ބިލް މިއަދު މަޖިލިހުގެ އެޖެންޑާގައި ހިމެނުމާ ގުޅިގެން ރައީސް ސާލިހު ވިދާޅުވީ، މި އިސްލާހުތައް އަނބުރާ ގެންދިއުމަށް ގޮވާލައްވާ ކަމަށެވެ.
ރައީސް ސާލިހު ފާހަގަކުރެއްވީ 2019 ގައި ސިޔާސީ ހުރިހާ ފިކުރުތަކުގެ ތާއީދާއެކު ފާސްކުރި އިސްލާހުތަކުގެ ސަބަބުން ކައުންސިލްތައް ފުދުންތެރިވާން ފަށާފައިވާ ކަމަށެވެ. ރަށްތަކުގެ އިހުތިސާސް ކަނޑައެޅި، ދައުލަތުގެ އާމްދަނީން ވަކި މިންވަރެއް ބްލޮކް ގްރާންޓްގެ ގޮތުގައި ލިބި، ވިޔަފާރި ކުރެވޭނެ ހުއްދަތައް ދިނުމުގެ ހެޔޮ ނަތީޖާ ފެންނަމުންދާ ކަމަށް ވެސް ވިދާޅުވިއެވެ.
ސަރުކާރުން ހުށަހެޅި ބިލްގައި ކައުންސިލްގެ އުމުރުގެ ފަހު އަހަރު ފިނޭންސް މިނިސްޓްރީ އާއި އެލްޖީއޭގެ އުސޫލުތަކާ އެއްގޮތަށް ނޫނީ މުވައްޒަފުން ނެގުމާއި ބިން ކުއްޔަށް ދޫކުރުން ފަދަ ކަންކަން ނުކުރެވޭނެ ކަމަށް ބުނެފައިވެއެވެ. އަދި ލޯކަލް އޮތޯރިޓީ ކުންފުނިތަކުން އިގްތިސާދީ ހަރަކާތްތައް ހިންގުމަށް ގިނަ ޝަރުތުތައް ކަނޑައަޅައި، 10 މިލިއަން ރުފިޔާއަށްވުރެ ބޮޑު އިންވެސްޓްމަންޓް ނުކުރެވޭނެ ކަމަށް ވެސް ހިމަނާފައިވެއެވެ.
މީގެ އިތުރުން ކައުންސިލްތަކުގެ ބޭންކް އެކައުންޓްތައް ހިންގާނީ ފިނޭންސް މިނިސްޓްރީން ކަނޑައަޅާ އުސޫލެއްގެ ތެރެއިން ކަމަށާއި، އެ މިނިސްޓްރީން އެދިއްޖެނަމަ ބޭންކް ސްޓޭޓްމަންޓް ދޭންޖެހޭނެ ކަމަށް ވެސް ބިލްގައި ބުނެފައިވެއެވެ.
ކޮމެންޓު ފޮނުވާ