އިންޑިއާއިން ދިވެހިރާއްޖެއަށް ދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ތެރެއިން 450 މިލިއަން ޑޮލަރު އަދިވެސް ބޭނުންނުކޮށް ހުރިކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ. މި ފައިސާތައް ރައްޔިތުންނަށް އެންމެ ފައިދާހުރި ގޮތެއްގައި ބޭނުންކުރުމަށް މަޝްވަރާކުރާނެ ކަމަށް އެމަނިކުފާނު އުންމީދުކުރައްވާ ކަމަށް ވެސް ވިދާޅުވިއެވެ.
އެމަނިކުފާނު "އެކްސް" ގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނުގެ ސަރުކާރުގެ ދައުރުގައި ދިވެހިރާއްޖޭގެ ތަރައްގީގެ މަޝްރޫއުތަކަށް އިންޑިއާ ސަރުކާރުން ހަމަޖައްސައިދިން މި ލައިން އޮފް ކްރެޑިޓްގެ ތެރެއިން ގާތްގަނޑަކަށް 450 މިލިއަން ޑޮލަރު އަދިވެސް ބާކީ ހުންނާނެ ކަމަށެވެ.
ރައީސް ސާލިހު ވިދާޅުވި ގޮތުގައި މި ފައިސާތަކަކީ މާލޭ ކޮމާޝަލް ޕޯޓް ގުޅީފަޅަށް ބަދަލުކުރުމަށާއި، ކްރިކެޓް ސްޓޭޑިއަމެއް އެޅުމަށާއި، ލ. ގަމުގައި އެޅުމަށް ނިންމި ކެންސަރު ހޮސްޕިޓަލަށާއި، މިފްކޯ އެކްސްޕެންޝަން މަސައްކަތަށް އޭރުގެ ސަރުކާރުން ކަނޑައަޅާފައިވާ ފައިސާއެވެ.
އިންޑިއާގެ ބޮޑުވަޒީރު ނަރެންދަރަ މޯދީ މިވަގުތު ދިވެހިރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގައި ދެ ގައުމުގެ ސަރުކާރުތަކުގެ ދެމެދުގައި ކުރިއަށްދާ ރަސްމީ މަޝްވަރާތަކުގައި، މި ފައިސާތައް ދިވެހި ރައްޔިތުންނަށް އެންމެ ފައިދާހުރި ގޮތަކަށް ބޭނުންކުރެވޭނެ މަގެއް ހޯދުމަށް މިހާރުގެ ސަރުކާރުން މަސައްކަތް ކުރައްވާނެ ކަމަށް އެމަނިކުފާނު އުންމީދުކުރައްވާ ކަމަށް ވެސް ރައީސް ސާލިހުގެ ޕޯސްޓުގައި ފާހަގަކުރައްވާފައިވެއެވެ.
ކޮމެންޓު ފޮނުވާ