ވ. އަތޮޅު ކެޔޮދޫ ކައިރީގައި ފަރަށް އަރާފައި ހުރި ބޯޓެއް ފަރުން ނެއްޓިގެން، އެ އަތޮޅުގެ ތެރެއިން ހުޅަނގު އުތުރަށް އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އިލްތިމާސްކޮށްފިއެވެ.
އެމްއެންޑީއެފްގެ މައުލޫމާތު ލިބިފައިވާ ގޮތުގައި، މި ބޯޓު އޮޔާދާނެ ކަމަށް ލަފާކުރެވެނީ ވ. އަތޮޅު ތެރެއިން ގޮސް އަލިހުރަސް ކަނޑާ ދިމާލަށް ކަމަށެވެ. މި ސަބަބާހުރެ، ވ. އަތޮޅު ވަށައިގެންވާ ކަނޑުގެ ސަރަހައްދުން ދަތުރުކުރާ ފަރާތްތަކުން، ހާއްސަކޮށް ރޭގަނޑުގެ ވަގުތުތަކުގައި ދަތުރުކުރާއިރު ވަރަށް ބޮޑަށް ސަމާލުވުމަށް އެމްއެންޑީއެފް އިން އެދިފައިވެއެވެ.
މި ބޯޓަކީ މީގެ ގާތްގަނޑަކަށް 10 އަހަރު ކުރިން ރާއްޖެއިން ބޭރުން އޮޔާ އައި، ސްރީލަންކާއަށް ނިސްބަތްވާ ބޯޓެކެވެ. ފުރަތަމަ ވ. އަތޮޅަށް ވަނުމުން، އެ އަތޮޅު ތިނަދޫ ރައްޔިތުން މި ބޯޓު ކަފު ޖަހައިގެން ގެންދަން މަސައްކަތްކުރި ނަމަވެސް، އެންމެ ދޯންޏެއްގައި އެކަން ކުރެވޭ ގޮތް ނުވިއެވެ.
އެމްއެންޑީއެފަށް މި މައުލޫމާތު ލިބުމުން، އެ ފަރާތުން އެ ސަރަހައްދަށް ގޮސް ބޯޓު ކައިރިއަށް ފީނައި، އޭގައި ހަތިޔާރު ހުރިތޯ ބަލާ ޗެކްކޮށްފައިވެއެވެ. ފަހުން ވ. ކެޔޮދޫ ބަޔަކު އެ ބޯޓު ކަފު ޖަހައިގެން އެ ރަށް ކައިރިއަށް ގެންގޮސް، މިހާރު އޮންނަ ސަރަހައްދުގައި މަޑުޖައްސާފައި އޮއްވައި އޮޔާ ގެންގޮސްފައިވެއެވެ.
މި ޝިޕްރެކަކީ ރާއްޖެއަށް ޒިޔާރަތްކުރާ ފަތުރުވެރިންގެ މެދުގައި ވަރަށް މަގްބޫލު ތަނަކަށް ވީ ނަމަވެސް، މިއަހަރުގެ ޖަނަވަރީ މަހު ރާއްޖެއަށް ކުރި ބޮޑު ވިއްސާރައިގައި މި ޝިޕްރެކަށް ގެއްލުންތަކެއް ލިބިފައިވެއެވެ. އެހެންކަމުން، މިހާރު މި ބޯޓުގެ ބައެއް ފަރުން ނެއްޓި އޮޔާދާތީ، ދަތުރުވެރިންނަށް އިތުރު ނުރައްކަލެއް ކުރިމަތިވެދާނެ ކަމަށް ބެލެވެއެވެ.
ކޮމެންޓު ފޮނުވާ