މާޅޮސްމަޑުލު އުތުރުބުރީ ދުވާފަރުގައި ބީއެމްއެލް އިސްލާމިކްގެ ބްރާންޗެއް ހުޅުވައި، ރާއްޖޭގެ ފުރަތަމަ "ޕޭޕަރ ލެސް" ޑިޖިޓަލް ބޭންކިންގ ނިޒާމު ތައާރަފްކޮށްފިއެވެ.
ބޭންކުގެ 40 ވަނަ ބްރާންޗްގެ ގޮތުގައި ހުޅުވުނު މި ބްރާންޗް ރަސްމީކޮށް ހުޅުއްވައިދެއްވީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ. ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ، ރައްޔިތުންނަށް ރަށުގައި ތިބެގެން ގިނަ ޚިދުމަތްތަކެއް ދިނުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވާ ކަމެއްކަމަށާއި، އާބާދީ ބޮޑު ރަށެއްކަމުގައިވާ ދުވާފަރުގައި ބްރާންޗެއް ހުޅުވުމަކީ ރައްޔިތުން އެތައް ދުވަހެއް ވަންދެން އެދެމުން ދިޔަ ކަމެއްކަމަށެވެ.
ބީއެމްއެލްގެ ޑިރެކްޓަރ އޮފް ރީޓެއިލް އެންޑް އެސްއެމްއީ ބޭންކިންގ، ބަދުރުއްދީން ހަސަން ވިދާޅުވީ، މިއީ ރާއްޖޭގައި ހުޅުވުނު ފުރަތަމަ ޑިޖިޓަލް ބޭންކިންގ ނިޒާމުކަމަށާއި، މި ނިޒާމުގެ ސަބަބުން ކަރުދާސް ބޭނުންނުކޮށް ޚިދުމަތްތައް ފޯރުކޮށްދެވޭނެކަމަށެވެ.
ދުވާފަރު ބްރާންޗުން 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން، ބިލްތަކަށް ފައިސާ ދެއްކުމާއި ޓްރާންސްފަރ ކުރުމުގެ ޚިދުމަތް ލިބިގެންދާނެއެވެ. ރަސްމީ ގަޑިގައި އެކައުންޓް ހުޅުވުމާއި، ލޯނު ދޫކުރުމުގެ މަސައްކަތްތަކާއި، ކާޑުގެ ޚިދުމަތްވެސް ލިބޭނެއެވެ. މި ބްރާންޗުން ޚިދުމަތް ފޯރުކޮށްދޭނީ އިސްލާމީ ޝަރީއާއި އެއްގޮތަށެވެ.
މި އައު ބްރާންޗާއެކު ބީއެމްއެލްގެ ވިއުގަ މިހާރު ފެތުރިފައިވަނީ 20 އަތޮޅެއްގައި 40 ބްރާންޗް، 133 ސެލްފްސަރވިސް ބޭންކިންގ ސެންޓަރ، 188 އޭޓީއެމް، އަދި 200އަށްވުރެ ގިނަ ކޭޝް އޭޖެންޓުންނާ ހަމައަށެވެ.
ކޮމެންޓު ފޮނުވާ