ފެނަކަ ކޯޕަރޭޝަނުން ރެފްކޫލް މޯލްޑިވްސް ޕްރައިވެޓް ލިމިޓެޑަށް ދައްކަންޖެހޭ 722,812.92 ރުފިޔާ ދެއްކުމަށް ސިވިލް ކޯޓުން އަމުރުކޮށްފިއެވެ. މިއީ ރެފްކޫލުން ފެނަކައަށް ފޯރުކޮށްދިން މުދަލާއި ޚިދުމަތުގެ އަގުގެ ގޮތުގައި ދައްކަންޖެހި، ނުދައްކައި ހުރި ފައިސާއެވެ.
ރެފްކޫލުން ހުށަހެޅި ދައުވާގައި ބުނެފައިވަނީ، އެ ކުންފުނިން ފޯރުކޮށްދިން މުދަލާއި ޚިދުމަތްތަކުގެ އިތުރުން، ޕްރޮޖެކްޓް ސްކޯޕަށް އައި ބަދަލުތަކާ ގުޅިގެން ދޫކުރި މުދަލުގެ އަގުވެސް ފެނަކައިން ދައްކާފައި ނުވާ ކަމަށެވެ. މި ފައިސާ ހޯދުމަށް ރެފްކޫލުން ކޯޓަށް ހުށަހެޅުމުން، ފެނަކައިން ވަނީ ދައުވާގައި ބުނާ އަދަދު ދައްކަންޖެހޭކަން ގަބޫލުކޮށްފައެވެ.
ކޯޓުގެ ހުކުމާ އެއްގޮތަށް، ފެނަކައިން މި ފައިސާ ދައްކަންޖެހޭނީ ތިން މަހުގެ މުއްދަތެއްގެ ތެރޭގައެވެ. ޖުލައި 2 ވަނަ ދުވަހުން ފެށިގެން ކޮންމެ މަހެއްގެ ވަކި އަދަދެއް ދައްކަމުން ގެންދިއުމަށް ކޯޓުން އަންގާފައިވެއެވެ. މިގޮތުން ކޮންމެ މަހަކު ދައްކަންޖެހޭ މިންވަރަށްވުރެ މަދުނޫން އަދަދެއް ރެފްކޫލަށް ދެއްކުމަށް ފެނަކައިގެ މައްޗަށް ލާޒިމުކޮށްފައިވެއެވެ.
ފާހަގަކޮށްލެވޭ ކަމަކީ، ފެނަކަ ކޯޕަރޭޝަނުން އެކި ފަރާތްތަކަށް ދައްކަންޖެހޭ ފައިސާ ނުދެއްކުމުގެ މައްސަލަތައް ކޯޓުތަކަށް ހުށަހެޅި، ފެނަކައިގެ މައްޗަށް ފައިސާ ދެއްކުމަށް އަމުރުކުރާ ހުކުމްތައް މީގެ ކުރިންވެސް އެތައް ފަހަރަކު ކޮށްފައިވާކަމެވެ. މި ހުކުމަކީވެސް އެފަދަ ހުކުމެއްކަމުގައި ފާހަގަކުރެވެއެވެ.
ކޮމެންޓު ފޮނުވާ