އިސްރާއީލުން ދެމުންގެންދާ ހަމަލާތައް ހުއްޓާލުމުން މެނުވީ ނިއުކްލިއާ މައްސަލައާ ގުޅޭގޮތުން އެމެރިކާއާއި ޔޫރަޕިއަން ޔޫނިއަނާއެކު މަޝްވަރާކުރުމަށް ތައްޔާރު ނުވާނެކަމަށް އިރާނުން ބުނެފިއެވެ.
އިރާނުގެ ފޮރިން މިނިސްޓަރު އައްބާސް އަރާޗީ އިއްޔެ ނޫސްވެރިންނާ ވާހަކަދައްކަވަމުން ވިދާޅުވީ، އެމެރިކާއިން އެތައް ފަހަރަކު އިރާނާއެކު މަޝްވަރާކުރުމަށް އެދުނު ނަމަވެސް، އިސްރާއީލުގެ ހަމަލާތައް ނުހުއްޓާހާ ހިނދަކު އެއްވެސް މަޝްވަރާއެއް ނުކުރާނެ ކަމަށެވެ. އިސްރާއީލުން ހިންގަމުންދާ އަމަލުތަކުގެ ސަބަބުން މިފަދަ މަޝްވަރާތަކަށް ދިއުމަކީ އިރާނަށް ގަބޫލުކުރެވޭނެ ކަމެއް ނޫންކަމަށް އޭނާ ހާމަކުރެއްވިއެވެ.
މިދިޔަ ދެ ހަފުތާގެ ތެރޭގައި އިރާނާ ގުޅޭގޮތުން ގޮތެއް ނިންމާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވެއެވެ. ރައީސް ޓްރަމްޕް ވަނީ އިރާނުގެ މައްސަލަ ސުލްހަވެރި ގޮތެއްގައި ހައްލުކުރުމަށްޓަކައި މަޝްވަރާގެ މަގު ހޯދުމަށް މަސައްކަތް ކުރައްވަމުންދާ ކަމަށް ވެސް ފާހަގަކުރައްވާފައެވެ.
އިރާނާއި އިސްރާއީލާ ދެމެދު ކުރިޔަށްދާ ހަނގުރާމަ މިހާރު ވަނީ ދެވަނަ ހަފުތާއަށް އެޅިފައެވެ. މި މުއްދަތުގެ ތެރޭގައި އިސްރާއީލުން އިރާނުގެ ނިއުކްލިއާ ތަންތަނަށް ހަމަލާދިނުމުގެ އިތުރުން، އާންމު ރައްޔިތުން ދިރިއުޅޭ ސަރަހައްދުތަކަށް ވެސް ހަމަލާދީ، ގިނަ އަދަދެއްގެ މީހުން މަރާލާފައިވެއެވެ. މި ހާލަތު ދެމިގެންދާ ނަމަ ނިއުކްލިއާ މަޝްވަރާތައް ކުރިޔަށް ގެންދިއުމަކީ ދަތިކަމެއް ކަމުގައި އިރާނުން ދެކެއެވެ.
ކޮމެންޓު ފޮނުވާ