ގައިންގަޔަށް އަރާ ބައްޔެއް ހުރިކަމަށް ބެލެވޭ ބަންގްލަދޭޝް ބިދޭސީއަކު ފިލައިގެން އުޅޭތީ، އޭނާ ހޯދުމުގެ މަސައްކަތް ކުރިޔަށް ގެންދަމުން ދާކަމަށް މައުލޫމާތު ލިބިއްޖެއެވެ.
ހޯދަމުން ދަނީ އުމުރުން 31 އަހަރުގެ ބަންގްލަދޭޝް ފިރިހެނެކެވެ. މި ބިދޭސީ މީހާ އަކީ ވިލިމާލޭގައި ހުންނަ ފެކްޓަރީއެއްގައި މަސައްކަތް ކުރާ މީހެކެވެ. ރާއްޖޭގައި މަސައްކަތް ކުރާތާ 10 އަހަރު ވެފައިވާ މި ބިދޭސީ މީހާ، ވިލިމާލޭގެ ފެކްޓަރީގެ ވަޒީފާ އަށް ގެނެވުނީ މީގެ 2 އަހަރު ކުރިން ކަމަށް މައުލޫމާތު ލިބިފައިވެ އެވެ.
ވިސާ އާކުރުމަށް ކުރި މެޑިކަލް ޓެސްޓުން މި ބިދޭސީ މީހާގެ ހަށިގަނޑުގައި ގައިންގަޔަށް އަރާ ބައްޔެއް ހުރިކަން ފާހަގަ ކުރެވުނު ކަމަށް ވެ އެވެ. އެހެން ނަމަވެސް އެއީ ކޮން ބާވަތެއްގެ ބައްޔެއްކަން ހާމަ ކުރެވިފައެއް ނުވެ އެވެ. މި މައުލޫމާތު ހެލްތު ޕްރޮޓެކްޝަން އެޖެންސީ (އެޗްޕީއޭ) އަށް އެނގޭނެ ކަމަށް ވަނީ ބުނެފަ އެވެ.
މި މައުލޫމާތު ހާމަކުރި ފަރާތަކުން ބުނި ގޮތުގައި، ފަރުވާ ހޯދުމަށް މި ބިދޭސީ މީހާ މޭ މަހުގެ 26 ވަނަ ދުވަހު ހެނދުނު ވެލާނާ އިންޓަނޭޝަނަލް އެއާޕޯޓަށް ދާން ވިލިމާލޭ ފެރީއަށް އެރި އެވެ. ނަމަވެސް އެޗްޕީއޭ އިން ބުނި ގޮތުގައި އޭނާ ރާއްޖެއިން ބޭރަށް ގޮސްފައެއް ނުވެ އެވެ.
އާންމުންގެ ސަލާމަތާއި ރައްކާތެރިކަމަށްޓަކައި މި މައުލޫމާތު ސޯޝަލް މީޑިއާގައި ހިއްސާ ކުރިކަމަށް މި މައުލޫމާތު ހާމަކުރި ފަރާތުން ބުންޏެވެ. މި ބިދޭސީ މީހާގެ އެއްވެސް މައުލޫމާތެއް އެޗްޕީއޭ އިން މިހާތަނަށް ހާމަކޮށްފައެއް ނުވެއެވެ.
ކޮމެންޓު ފޮނުވާ