ސައުތު ޕޮލިސްގެ މުވައްޒަފުންގެ އަގުވަޒަންކުރުމަށް ބޭއްވުނު ޚާއްޞަ ހަފުލާއެއްގައި، ފުލުހުން ތެދުވެރިކަމާއި އިންޓެގްރިޓީއާއެކު މަސައްކަތް ކުރުމަށް ކޮމިޝަނަރ އޮފް ޕޮލިސް އަލީ ޝުޖާއު އިލްތިމާސްކުރައްވައިފިއެވެ.
އައްޑޫގައި މަސައްކަތްކުރަމުން އަންނަ ސައުތު ޕޮލިސްގެ ސްޕެޝަލިސްޓް ޓީމުތަކުގެ ފުލުހުން މިދިޔަ އަހަރު ކޮށްފައިވާ މަސައްކަތްތަކަށް އިޙްތިރާމް އަދާކުރުމަށް ބޭއްވުނު ސްޓާފް އެޕްރިސިއޭޝަން ނައިޓްގައި ވާހަކަފުޅު ދައްކަވަމުން، ކޮމިޝަނަރ ޝުޖާއު ވިދާޅުވީ ފުލުހުންގެ މަސައްކަތަކީ ވަރަށް މާތް މަސައްކަތެއްކަމަށެވެ. މިފަދަ މާތް މަސައްކަތެއް ކުރާއިރު ހުރިހާ ފުލުހުންވެސް ތެދުވެރިކަމާއި އިންޓެގްރިޓީ ހިފަހައްޓަންޖެހޭކަމުގައި އެމަނިކުފާނު ބާރުއަޅުއްވައި ވިދާޅުވިއެވެ.
ސައުތު ޕޮލިސްގެ ހުރިހާ ފުލުހުންނާ ބައްދަލުކުރެއްވުމުން ބޮޑު ހިތްހަމަޖެހުމެއް ލިބިވަޑައިގަންނަވާކަން ކޮމިޝަނަރ ފާހަގަކުރެއްވިއެވެ. އަދި ސައުތު ޕޮލިސްގެ މުވައްޒަފުންނަކީ ވަރަށް ނަމޫނާ މަސައްކަތްތަކެއް ކުރަމުން އަންނަ ބައެއްކަމަށްވެސް އެމަނިކުފާނު ފާހަގަކުރެއްވިއެވެ.
ހަފުލާގައި ވާހަކަފުޅު ދައްކަވަމުން، ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރ އޮފް ޕޮލިސް އަޙުމަދު ޝަމީމް، ސައުތު ޕޮލިސްގެ ތަރައްޤީއަށް ކުރެވިފައިވާ މުހިންމު މަސައްކަތްތަކާއި ރީޖަންގައި ޤާއިމްކުރެވިފައިވާ އެކިއެކި ނިޒާމުތަކުގެ ސަބަބުން މަސައްކަތަށް ލިބިފައިވާ ކުރިއެރުންތައް ހިއްސާކުރެއްވިއެވެ.
މި ހަފުލާގައި އައްޑޫގައި މަސައްކަތްކުރާ ފުލުހުންނާއި ސައުތު ޕޮލިސްގެ އެކި ޔުނިޓުތަކުގައި މަސައްކަތްކުރާ މުވައްޒަފުންގެ ތެރެއިން އެންމެ ރަނގަޅަށް މަސައްކަތްކޮށްފައިވާ ފުލުހުންނަށާއި، އާންމު މުވައްޒަފުންނަށާއި ޓެކްނިކަލް މުވައްޒަފުންނަށް ހަނދާނީ ލިޔުން ދެއްވިއެވެ. މީގެއިތުރުން، އެންމެ ރަނގަޅު މަސައްކަތްތައް ކުރި ޑިޕާޓްމަންޓުތަކާއި ޔުނިޓުތަކުގެ އަގުވަޒަންކޮށް ހަނދާނީ ލިޔުންވެސް ޙަވާލުކުރެވުނެވެ.
ކޮމެންޓު ފޮނުވާ