ރޯދަމަހުގެ ފުރަތަމަ 20 ދުވަހުގެ ތެރޭގައި ފިތުރު ޒަކާތުގެ ގޮތުގައި 7.6 މިލިއަނަށް ވުރެ ގިނަ ރުފިޔާ ބަލައިގަތުމުން ފާއިތުވެދިޔަ ފަސް އަހަރުގެ ތެރޭގައި އެންމެ މަތީ ރެކޯޑު ހާސިލުވެފައިވާކަމަށް މޯލްޑިވްސް ޒަކާތު ހައުސްއިން މިއަދު ހާމަކޮށްފިއެވެ.
މޯލްޑިވްސް ޒަކާތު ހައުސްއިން ހިއްސާކުރި ތަފާސްހިސާބުތަކުން ދައްކާގޮތުގައި، ރޯދަމަހުގެ ފުރަތަމަ 10 ދުވަހުގެ ތެރޭގައި 2.9 މިލިއަން ރުފިޔާ ބަލައިގަނެފައިވާއިރު، މެދު 10 ދުވަހުގެ ތެރޭގައި 4.7 މިލިއަން ރުފިޔާ ބަލައިގެންފައިވެއެވެ.
ޒަކާތު ހައުސްއިން ހާމަކުރި މަޢުލޫމާތުން އެނގޭގޮތުގައި ފިތުރު ޒަކާތުގެ ގޮތުގައި ބަލައިގަތް މިންވަރު އަހަރުންއަހަރަށް އިތުރުވަމުން އަންނަކަން ފާހަގަކުރެވެއެވެ. އެގޮތުން، ފާއިތުވެދިޔަ ފަސް އަހަރުގެ ތެރޭގައި ރޯދަމަހުގެ ފުރަތަމަ 20 ދުވަހުގެ ތެރޭގައި ބަލައިގަނެފައިވާ މިންވަރަށް ބަލާއިރު:
- 2021 ވަނަ އަހަރު: 3.1 މިލިއަން ރުފިޔާ
- 2022 ވަނަ އަހަރު: 3.7 މިލިއަން ރުފިޔާ
- 2023 ވަނަ އަހަރު: 4.6 މިލިއަން ރުފިޔާ
- 2024 ވަނަ އަހަރު: 4.6 މިލިއަން ރުފިޔާ
- 2025 ވަނަ އަހަރު: 7.6 މިލިއަން ރުފިޔާ
ޒަކާތު ހައުސްއިން އިތުރަށް އަންގާފައިވާގޮތުގައި ރޯދަމަހުގެ ފަހު 10 ދުވަހުގެ ތެރޭގައި ފިތުރު ޒަކާތް ބަލައިގަތުން ކުރިއަށްދާނެއެވެ. އެގޮތުން، އިސްލާމީ މަރުކަޒުގެ ޖަލްސާކުރާ މާލަމުގައި ހުންނަ ކައުންޓަރުތަކުން މާޗު 23 އިން 30 އަށް، ހުކުރު އަދި ހޮނިހިރު ފިޔަވައި ކޮންމެ ދުވަހަކު ހެނދުނު 11 އިން މެންދުރު 2 އަށް ފިތުރު ޒަކާތް ބަލައިގަންނާނެއެވެ.
ގޮވާމުން ފިތުރު ޒަކާތް ބަލައިގަތުން ކުރިއަށްދާނީ މާޗު 27 ގެ ނިޔަލަށް ކޮންމެ ދުވަހަކު މެންދުރު 1 އިން ހަވީރު 4 އަށް އިސްކަންދަރު ސްކޫލުގައި ކަމަށް ޒަކާތު ހައުސްއިން ބުނެފައިވެއެވެ.
މީގެ އިތުރުން، ބަނޑޭރި ޕޭ، ފަހިޕޭ، ބީއެމްއެލް، އެމްއައިބީ، ދިރާގު އަދި އުރީދޫ މެދުވެރިކޮށް އޮންލައިންކޮށްވެސް ފިތުރު ޒަކާތް ދެއްކުމުގެ އިންތިޒާމް ހަމަޖެހިފައިވާކަން ޒަކާތު ހައުސްއިން ފާހަގަކޮށްފައިވެއެވެ.
ކޮމެންޓު ފޮނުވާ