މިޤައުމުން އިންޑިޔާ ސިފައިން ނުބާލާނެ ހަމަ އެއްގޮތެއްވެސް ނޯންނެކަމުގައި 2023ގެ ރިޔާސީ އިންތިޚާބުގައި ވާދަކުރައްވާނެކަމަށް އިއުލާން ކުރައްވާފައިވާ ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެ އެވެ.
އިންޑިޔާ ސިފައިން ރާއްޖެއިން ބޭލުމަށް އެންމެ ބޮޑަށް އަޑު އުފުލަމުންދާ އުމަރު ނަސީރު ވިދާޅުވީ ދިވެހި ފަސްގަޑަކީ މިނިވަންކަމުގެ ވިންދު ޖަހަޖަހާ ހުންނަ ފަސްގަޑެއްކަމަށެވެ. ތާރީޚީ ސަފުޙާތައް އުކާލުމުން، މި ޤައުމަށް ޤައްދާރުވި ދިވެހިންނާ، ޤައުމަށްޓަކައި ޖިހާދު ކުރި ބަތަލުން ފެންނާނެކަމަށެވެ. އަދި ތިލަ ވިސްނުމުގެ ސިޔާސީ ބޭފުޅުންނާ، ޤައުމީ ވިސްނުމުގެ ސިޔާސީ ލީޑަރުންވެސް ފެންނަމުންދާކަމަށެވެ.
އައްޔަކަސް އަނދިރިޔަކަސް މަށަށް ކީއްހޭ ބުނި މީހުނާ، ބޭރުޤައުމެއްގެ ސިފައިން ތިއްބަސް ކީއްހޭ ބުނާ މީހުން ފެނޭ. އުމަރު ވިދާޅުވިއެވެ.
އުަމރު ވިދާޅުވީ މި ފަސްގަނޑުގައި ކިތަންމެ ބައިވަރު އިންޑިޔާގެ ވަސީލަތްތައް ހުރިކަމުގައި ވީނަމަވެސް އެތަކެއްޗާއިއެކީ އިންޑިޔާގެ ސިފައިން މިގައުމުން ބާލާނެކަމަށެވެ. އެކަން ކުރުމަށް މިޤައުމުގެ ރައްޔިތުން ތިބީ ސާބިތުކަމާއިއެކު އަތުގުޅާލައިގެން ކަމަށް އުމަރު ވިދާޅުވި އެވެ.
ހެލިކޮޕްޓަރެއް، ޑޯނިޔާއެއް، ރާޑަރެއް ބެލުމެއްނެތި މިޤައުމުން އިންޑިޔާ ސިފައިން ނުބާލާނެ ހަމަ އެއްވެސް ގޮތެއް އިރާދަކުރެއްވިއްޔާ ނޯންނާނެއެވެ. މި ފަސްގަޑުން ޖަހަމުންދާ މިނިވަންކަމުގެ ވިންދަކަށް ބަދަލެއް ނާދޭ. އުމަރު ނަސީރު ވިދާޅުވި އެވެ.
އުމަރު ވިދާޅުވީ ދިވެހިތާރީޚު ހެކިދޭ އެއްކަމަކީ ދިވެހި ޤައުމުގެ މިނިވަން ކަމަށް ބުރޫއަރާ ކޮންމެ ފަހަރަކު، ވެރިންގެ ތިލަ ވިސްނުންތަކާ، ބަދެވިފައިވާ ވެރިންގެ ބަދެވުން ތަކަށް ބެލުމެއްނެތި، ޤައުމުގެ މިނިވަންކަން ދިފާޢު ކުރަން ތެދުވާ އެތަށް ދިވެހި ދަރިންނެތް މިފަސްގަޑު އުފައްދާފައިވާ ކަމަށެވެ. އަދި މިފަދަ ދަރިންތަކެއް އަނެއްކާވެސް މިއަންނަނީ އުފެދެމުން ކަމަށް އުމަރު ވިދާޅުވިއެވެ.
ރާއްޖޭގައި ތިބޭ އިންޑިއާ ސިފައިންގެ އަދަދާއި އެހެނިހެން މައުލޫމާތު ހާމަކުރުމުގެ ސަބަބުން ދެ ގައުމުގެ ގުޅުމަށް ބުރޫއަރާފާނެ ކަމަށް ޑިފެންސް މިނިސްޓްރީން ވިދާޅުވިއެވެ. އިންޑިއާއިން ރާއްޖެއަށް ހަދިޔާ ކޮށްފައިވާ 2 ދެ ހެލްކޮޕްޓަރު އޮޕަރޭޓް ކުރުމަށާއި އެނޫންވެސް އެފަދަ އެހެން ކަންކަމަށް އިންޑިއާ ސިފައި ރާއްޖޭގެ އެކި ސަރަހައްދުތަކުގައި ހަރަކާތްތެރިވެއެވެ.
ކޮމެންޓު ފޮނުވާ