އެމްއެމްޕީއާރުސީން "އައިޓީބީ ބާލިން 2025″ ގައި ބައިވެރިވުމަށް 200 ޓެކްސީގައި ޕްރޮމޯޝަނަލް ކެމްޕޭނެއް ފަށައިފިއެވެ. މިއީ ވިޒިޓް މޯލްޑިވްސްއިން މިހާތަނަށް ކުރިއަށް ގެންދާ އެންމެ ބޮޑު އެއް އައުޓްޑޯ އިނީޝިއޭޓިވްއެވެ. މި ކެމްޕެއިންގެ ސަބަބުން ޖަރުމަން މާކެޓުގައި ރާއްޖެ ޕްރިމިއާ ޓްރެވަލް މަންޒިލެއްގެ ގޮތުގައި ފާހަގަކުރެވިގެންދާނެއެވެ.
ފެބްރުއަރީ މަހުގެ ހަތް ވަނަ ދުވަހުން މާޗް މަހުގެ 13 ވަނަ ދުވަހުގެ ނިޔަލަށް ފަސް ހަފްތާއަށް ކުރިއަށްދާ މި ކެމްޕޭން، ބާލިން އިންޓަނޭޝަނަލް ފިލްމް ފެސްޓިވަލް (ބާލިނޭލް) އަދި އައިޓީބީ ބާލިން އާ ދިމާކުރެވިފައިވެއެވެ. މި އިވެންޓްތަކުގައި 600،000 އަށް ވުރެ ގިނަ މީހުން ބައިވެރިވާނެކަމަށް ލަފާކުރެވޭއިރު، އެ ސަރަހައްދުގައި ދިވެހިރާއްޖޭގެ ފެނުން އިތުރުވެގެންދާނެއެވެ.
އެމްއެމްޕީއާރުސީން މައުލޫމާތު ދެއްވާފައިވާ ގޮތުގައި، ވިޒިޓް މޯލްޑިވްސްގެ ބްރޭންޑް އެކުލެވޭ 200 ޓެކްސީގައި ރާއްޖޭގެ މުނިފޫހިފިލުވުމުގެ މަންޒަރުތަކާއި ޝައުގުވެރިކަން އުފެދޭފަދα މެސެޖުތައް ހިމަނާފައިވެއެވެ. މި ޓެކްސީތައް ދުއްވާނީ ބާލިންގެ މުހިންމު ސަރަހައްދުތަކުގައެވެ. މީގެއިތުރުން، ބާލިނޭލްގައި ބޮޑެތި ބިލްބޯޑްތަކެއް ބެހެއްޓުމަށް ވެސް ހަމަޖެހިފައިވެއެވެ.
މި އައުޓްޑޯ ކެމްޕޭނަކީ އެމްއެމްޕީއާރުސީގެ ތާރީހުގައި ބާލިންގައި ކުރާ އެންމެ ބޮޑު އެއް ޕްރޮމޯޝަނަލް ހަރަކާތެވެ. މި ކެމްޕޭނުގެ އަމާޒަކީ ޖަރުމަނު ފަތުރުވެރިންގެ މެދުގައި ދިވެހިރާއްޖޭގެ ބްރޭންޑް ވިޒިބިލިޓީ އިތުރުކޮށް، ރާއްޖެއަށް ޝައުގުވެރިކަން އިތުރުކުރުމެވެ.
އައިޓީބީ ބާލިންގައި އެމްއެމްޕީއާރުސީން އިތުރު ހަރަކާތްތަކެއް ވެސް ރާވާފައިވެއެވެ. މީގެ ތެރޭގައި ސިނާއަތާ ގުޅޭ ސެމިނާތަކާއި ޕެނަލް ޑިސްކަޝަންތަކުގެ އިތުރުން، މީޑިއާ އަދި ނޫސްވެރިންނަށް އަމާޒުކޮށްގެން ބޭއްވޭ އައިއެމްއެމް ޖަރުމަނުގައި ބައިވެރިވުން ހިމެނެއެވެ. ނަމަވެސް، ކުރިން ރޭވިފައިވާ މޯލްޑިވިއަން ނައިޓް ވަނީ އޭޕްރީލް މަހުގެ ފަހުކޮޅު ދުބާއީގައި ބޭއްވޭ އަރަބިއަން ޓްރެވަލް މާކެޓް (އޭޓީއެމް) 2025 އަށް ބަދަލުކޮށްފައެވެ.
