އިޒްރޭލާއި ހަމާސް ޖަމާއަތުން ގާޒާގެ ހަނގުރާމަ ހުއްޓާލުމަށް އެއްބަސްވުމަކަށް އައުމާ ގުޅިގެން، އިޒްރޭލުން ފަލަސްތީނަށް ބަދަލު ދޭންޖެހޭނެ ކަމަށް ރައީސް މުހައްމަދު މުއިއްޒު ވިދާޅުވެއްޖެއެވެ. މި އެއްބަސްވުން އިއުލާންކުރުމާ ގުޅިގެން ރައީސް 'އެކްސް’ގައި ކުރެއްވި ޕޯސްޓެއްގައި ވިދާޅުވެފައިވަނީ، ނަސްލު ނައްތާލުމުގެ ހަނގުރާމަ ހުއްޓާލުމުގެ އެއްބަސްވުމަކަށް އާދެވުމަކީ ލިބިވަޑައިގެންނެވި ލުޔެއް ކަމަށެވެ.
15 މަސްދުވަހަށްވުރެ ދިގު މުއްދަތަކަށް ދެމިގެންދިޔަ ގާޒާގެ ހަނގުރާމަ ހުއްޓާލުމަށް އެއްބަސްވެފައިވާކަން އިޒްރޭލާ ގުޅިފައިވާ އެމެރިކާ އާއި ހަމާސް ޖަމާއަތުން ވެސް އިއުލާންކޮށްފައިވެއެވެ. އޮކްޓޯބަރު 2023 ގައި ފެށުނު މި ހަނގުރާމައިގައި ފަލަސްތީނުގެ 46,000 އަށްވުރެ ގިނަ މީހުން ޝަހީދުވެފައި ވެއެވެ.
މި އެއްބަސްވުމުގައި ހިމެނެނީ މައިގަނޑު ތިން މަރުހަލާއެކެވެ. ފުރަތަމަ މަރުހަލާ ހިނގާނީ 6 ހަފްތާއަށެވެ. މި މަރުހަލާގައި ހައްޔަރުކޮށްފައިވާ މަދަނީން ދޫކޮށްލުމާއި ގާޒާއިން އިޒްރޭލު ސިފައިން އެއްކޮށް ފައިބައި، އިންސާނީ އެހީތެރިކަން އިތުރުކުރެވޭނެއެވެ. 7 އޮކްޓޯބަރު 2023 ގައި ހަމާސްއިން އިޒްރޭލަށް ދިން ހަމަލާގައި ހިފަހައްޓާފައިވާ 33 މަދަނީން ދޫކޮށްލާނެއެވެ. މީގެ ތެރޭގައި އަންހެނުންނާއި ކުޑަކުދިންނާއި 50 އަހަރުން މަތީގެ މީހުން ހިމެނެއެވެ. މީގެ ބަދަލުގައި އިޒްރޭލުން ފަލަސްތީނުގެ 2,000 މީހުން ޖަލު ބަންދުން ދޫކޮށްލާނެއެވެ.
އެހީގެ ގޮތުގައި ދުވާލަކު 600 ޓްރަކުގެ މުދާ ގާޒާއަށް ވައްދާނެއެވެ. އަދި ހަނގުރާމައިގެ ސަބަބުން ގެދޮރު ދޫކޮށް ދިޔަ މީހުންނަށް އެނބުރި އުތުރު ސަރަހައްދުތަކަށް ދިއުމުގެ ފުރުސަތު ލިބި، ޒަހަމްވެފައިވާ ފަލަސްތީނު މީހުންނަށް ބޭރު ގައުމުތަކުން ފަރުވާ ހޯދުމުގެ ފުރުސަތު ދެވޭނެއެވެ.
ދެވަނަ މަރުހަލާއަށް އިޒްރޭލުން ނިންމައިފި ނަމަ، ހަމާސްއިން ބާކީ ތިބި ހައްޔަރުކުރެވިފައިވާ މީހުން ދޫކޮށްލާނެއެވެ. މީގެ ބަދަލުގައި އިޒްރޭލުން އިތުރު ފަލަސްތީނު މީހުން ޖަލު ބަންދުން ދޫކޮށްލައި، އިޒްރޭލު ސިފައިން ގާޒާއިން އެއްކޮށް ފައިބާނެއެވެ. ނަމަވެސް މި ޝަރުތުތަކާ މެދު އިޒްރޭލުގެ ކެބިނެޓުން އަދި ވޯޓުލާފައެއް ނުވެއެވެ. ތިންވަނަ މަރުހަލާގެ ތަފްސީލުތައް އަދި ސާފެއް ނޫނެވެ.
ރައީސް މުހައްމަދު މުއިއްޒު ބައިނަލްއަގުވާމީ މުޖުތަމައަށް ގޮވާލައްވާފައިވަނީ، ހަނގުރާމަ ހުއްޓާލުން ދެމެހެއްޓޭނެ ގޮތް ހެދުމަށާއި، ގެދޮރު ގެއްލިފައިވާ މީހުންނަށް އެނބުރި ގައުމަށް ދިއުމުގެ ފުރުސަތު ދިނުމަށާއި، އިންސާނީ އެހީތެރިކަން ލިބޭނެ ގޮތް ހެދުމަށެވެ. އަދި އިޒްރޭލުގެ އަނިޔާވެރިކަމުގެ ސަބަބުން ފަލަސްތީނަށް ލިބިފައިވާ ގެއްލުންތަކުން އަރައިގަތުމަށް، ފަލަސްތީނު އަލުން ބިނާކުރުމަށް ބޭނުންވާ އަވަސް އެހީތެރިކަން ފޯރުކޮށްދިނުމަށް ވެސް ގޮވާލައްވާފައިވެއެވެ.
