ސްޓެލްކޯގެ ކުރީގެ މެނޭޖިންގ ޑިރެކްޓަރ އަހުމަދު ޝަރީފްގެ ޕާސްޕޯޓް އިއްޔެ ކޯޓު އަމުރެއްގެ ދަށުން ހިފަހައްޓައިފައެވެ. އޭނާގެ ޕާސްޕޯޓު ހިފެހެއްޓީ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާއި ގުޅިގެންނެވެ.
އޭސީސީގެ އޮފިޝަލަކު ބައެއް މީޑިއާތަކަށް މަޢުލޫމާތު ދެއްވަމުން ވިދާޅުވެފައިވަނީ، މި ފިޔަވަޅު އަޅާފައިވަނީ މިހާރު ކޮމިޝަނުން ބަލަމުންދާ މައްސަލައަކާ ގުޅިގެން ކަމުގައެވެ. ނަމަވެސް އެ މައްސަލައިގެ ތަފްސީލެއް އޮފިޝަލު ހާމައެއް ނުކުރައްވައެވެ.
ޝަރީފްގެ ޕާސްޕޯޓް ހިފެހެއްޓިއިރު، އޭސީސީއަށް ހުށަހެޅިފައިވާ މައްސަލަތަކުގެ ތެރޭގައި، ސްޓެލްކޯއަށް ހަތް މިލިއަން ޑޮލަރުގެ ގެއްލުންވާގޮތަށް އެއްބަސްވުމެއްގައި ޝަރީފް ސޮއިކުރެއްވި މައްސަލައެއް ހިމެނެއެވެ.
ޝަރީފަކީ ނިމިގެންދިޔަ އެމްޑީޕީ ސަރުކާރުގައި 2022 ވަނަ އަހަރުގެ މާރިޗު 1 ވަނަ ދުވަހު ސްޓެލްކޯގެ މެނޭޖިންގ ޑިރެކްޓަރުގެ މަޤާމަށް ޢައްޔަންކުރެވުނު ފަރާތެކެވެ. މީގެ ކުރިން އޭނާ ވަނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި އިލެކްޝަންސް ކޮމިޝަނުގެ ރައީސްކަން ކުރައްވާފައެވެ.
މީގެއިތުރުން، ކުރީގެ ސަރުކާރުގެ ބިންވެރިޔާ ސްކީމާ ގުޅޭ މައްސަލައެއްގައި، ކުރީގެ ހައުސިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ހިމެނޭގޮތަށް، އެ މިނިސްޓްރީގެ ހަތަރު މުވައްޒަފެއްގެ ޕާސްޕޯޓްވެސް ވަނީ ހިފެހެއްޓިފައެވެ. މި މައްސަލައިގައި ތުހުމަތުކުރެވެނީ ބިންވެރިޔާ ސްކީމްގެ ލިސްޓުގައި ނުހިމެނޭ ފަރާތްތަކަކަށް ގޯތި ދީފައިވާ ކަމަށެވެ.
