އެމްޑީޕީން މިއަދު ނެރުނު ބަޔާނެއްގައި ތުހުމަތު ކުރައްވާފައިވާ ގޮތުގައި، ޕީއެންސީއަށް މެންބަރުން އިތުރުކުރުމަށް ހުށަހެޅުނު ފޯމުތަކުގެ މައްސަލާގައި ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން އިސް ދައުރެއް އަދާކުރައްވާފައިވެއެވެ. އެގޮތަށް އޭނާ މަގާމުން އެކަހެރި ކުރުމަށް އެމްޑީޕީން ވަނީ ގޮވާލާފައެވެ.
އިލެކްޝަންސް ކޮމިޝަނުގެ ބަހުންނާއި ޕީއެންސީގެ އަމިއްލަ އިއުތިރާފުން ސާބިތުވާ ގޮތުގައި، ޕީއެންސީއަށް މެންބަރުން އިތުރުކުރުމަށް ހުށަހެޅުނު ގިނަ ފޯމުތަކަކީ ސައްހަނޫން ފޯމުތަކެކެވެ. ޕީއެންސީން ބުނެފައިވަނީ މިކަން ހިނގާފައިވަނީ ހުށަހެޅޭ ފޯމުތަކުގެ ސައްހަކަން ޔަގީންކުރުމުގެ ގާބިލުކަން ޕާޓީގައި ނެތުމުގެ ސަބަބުން ކަމަށެވެ. ނަމަވެސް އެމްޑީޕީގެ ދެކޭގޮތުގައި މިއީ ގަސްތުގައި ރާވައިގެން ހިންގި ޖަރީމާއެކެވެ.
ސޯޝަލް މީޑިއާގައި ފެތުރިފައިވާ ފޮޓޯތަކުން ދައްކާގޮތުގައި، މި މުޅި މަސައްކަތް ކުރިއަށް ގެންގޮސްފައިވަނީ ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި ވަސީލަތްތައް ބޭނުންކޮށްގެން، މިނިސްޓަރު އިހުސާންގެ ސީދާ ބެއްލެވުމުގެ ދަށުންނެވެ. މިނިސްޓަރަކީ މާތްﷲ ގަންދީ ހުވައެއް ކުރައްވައިގެން ހުންނެވި ބޭފުޅެއްކަމުން، މި އަމަލަކީ އެ ހުވަޔާ ހިލާފު އަމަލެއް ކަމަށް އެމްޑީޕީން ފާހަގަކޮށްފައި ވެއެވެ.
މިނިސްޓަރު އިހުސާނަކީ ފުލުހުންގެ އިދާރާގެ ކަންކަން ބެލެހެއްޓެވުމާ ހަވާލުވެ ހުންނެވި ވަޒީރު ކަމަށްވާތީ، މި މައްސަލައިގެ އިންސާފުވެރި ތަހުގީގެއް ކުރެވޭނީ އެ މަނިކުފާނު މަގާމުން އެކަހެރިކުރެވިގެން ކަމަށް އެމްޑީޕީން ދެކެއެވެ. އަދި މިއީ ދައުލަތުގެ ވަސީލަތްތައް ބޭނުންކޮށްގެން ނާޖާއިޒު މަންފާއެއް ހޯދުމުގެ އަމަލަކަށްވާތީ، އެންޓި ކޮރަޕްޝަން ކޮމިޝަނުން މައްސަލަ ބެލުމަށްވެސް އެމްޑީޕީން ވަނީ ގޮވާލައިފައެވެ.
ރައްޔިތުން ސަރުކާރުގެ އިދާރާތަކަށް ހުށަހަޅާ ޒާތީ މައުލޫމާތުތަކަކީ ސިއްރު މައުލޫމާތުތަކެއްގެ ގޮތުގައި ބެލެވޭއިރު، މިފަދަ މައުލޫމާތުތަކުން ވައްކަންކުރުމަކީ އިންތިހާއަށް ނާތަހުޒީބު އަދި ހިޔާނާތުގެ އަމަލެއް ކަމުގައި އެމްޑީޕީން ދެކެއެވެ. އަދި މިއީ ސަރުކާރާމެދު ރައްޔިތުންގެ އިތުބާރު ގެއްލިގެންދާފަދަ ކަމަކަށްވާތީ، މިފަދަ ކަންކަން ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ ފަރާތްތަކަށް ގޮވާލައިފައިވެއެވެ.
