މާލެ ސިޓީގެ އަމީނީ މަގުގައި ހިނގި ނުރައްކާތެރި ހާދިސާއެއްގައި، ފުލުހެއްގެ ބޮލަށް އަނިޔާވެއްޖެއެވެ. ގިޔާސުއްދީން ސްކޫލް ކައިރީގައި ހުރި އިމާރާތެއްގެ ހަވަނަ ބުރީގެ ބެލްކަނިން ބިއްލޫރިގަނޑެއް ވެއްޓި އަނިޔާވީ، އެ ސަރަހައްދުގައި ޑިއުޓީ އަދާކުރަމުން ދިޔަ ފުލުހުގެ އޮފިސަރަކަށެވެ.
އާއިލާއިން މަޢުލޫމާތު ދެއްވާފައިވާ ގޮތުގައި، މި ހާދިސާގައި އޮފިސަރަށް އަނިޔާވި ނަމަވެސް، ފުރާނައަށް ނުރައްކާވާ ވަރުގެ އަނިޔާއެއް ނުވެއެވެ. އާއިލާގެ ބޭފުޅަކު ވިދާޅުވި ގޮތުގައި، މަގުމަތީގައި ހުރި ހޮޅިދަނޑިއެއްގައި ބިއްލޫރިގަނޑު ޖެހުމަށްފަހު އޮފިސަރުގެ ގައިގައި ޖެހުމުން، ލިބުނު އަނިޔާގެ މިންވަރު ކުޑަވި ކަމުގައެވެ. އެހެންނޫންނަމަ މާ ބޮޑަށް ޒަހަމްވީސްކަން އެ ފަރާތުން ބުނެފައި ވެއެވެ.
ހާދިސާ ހިނގި ވަގުތު އޮފިސަރު ހުރީ ފޯނު ކޯލެއްގައި އިމާރާތުގެ ކުރިމަތީގައި މަޑުކޮށްލައިގެންނެވެ. އިމާރާތުގެ ހަވަނަ ބުރީގެ ބެލްކަނީގައި ހަރުކޮށްފައިވާ ތިން ބިއްލޫރިގަނޑުގެ ތެރެއިން ވެއްޓުނީ އެއް ބިއްލޫރިގަނޑެވެ. އަނިޔާވި އޮފިސަރު ވަނީ އައިޖީއެމްއެޗުން ފަރުވާ ހޯދުމަށްފަހު ދޫކޮށްލާފައެވެ. މި ހާދިސާއާ ގުޅިގެން ފުލުހުން ވަނީ އެ ސަރަހައްދު ވަގުތީގޮތުން ބަންދުކޮށްފައެވެ.
ދައުރުވަމުންދާ ފޮޓޯތަކުން ދައްކާގޮތުގައި، އިމާރާތުގެ ހަވަނަ ބުރީގެ ބެލްކަނީގައި ތިން ބަޔަށް ބިއްލޫރި ހަރުކޮށްފައި އޮތް އިރު، އޭގެ ތެރެއިން އެއް ފަރާތުގެ ބިއްލޫރިގަނޑު ވަނީ ވެއްޓިފައެވެ.
މިފަދަ ހާދިސާތައް މާލޭގައި މީގެ ކުރިން ވެސް ހިނގާފައިވެއެވެ. މީގެ ތެރޭގައި 2017 ވަނަ އަހަރުގެ ޑިސެންބަރު މަހު، އިމާރާތެއްގެ މަތިން ވެއްޓުނު ސިމެންތި ބަސްތާއަކުން ޖެހި ބަންގްލަދޭޝްގެ 7 އަހަރުގެ އަންހެން ކުއްޖަކު މަރުވި ހާދިސާ ހިމެނެއެވެ.
