އައްޑޫގެ މަރުކަޒީ އިންޖީނުގޭގެ ހަ ޖަނަރޭޓަރަށް ދިމާވެފައިވާ ޓެކްނިކަލް މައްސަލަތަކާ ގުޅިގެން އައްޑޫގެ ގުޅިފައިވާ އަވަށްތަކުން ކަރަންޓު ކެނޑެން ފަށައިފިއެވެ. ފެނަކައިން މަޢުލޫމާތު ދެއްވާފައިވާ ގޮތުގައި މި މައްސަލަ ހައްލުކުރެވެންދެން ހިތަދޫ، މަރަދޫ، މަރަދޫފޭދޫ އަދި ފޭދޫއިން ކޮންމެ ދުވަހެއްގެ ހަވީރުން ފެށިގެން އެކި ގަޑިތަކުގައި ކަރަންޓު ކަނޑަމުންދާނެއެވެ. މި މައްސަލަ ހައްލުކުރުމަށް ފެނަކައިގެ މުވައްޒަފުން މިހާރުވެސް ދަނީ މަސައްކަތް ކުރަމުންނެވެ.
އައްޑޫއަށް ދިމާވެފައިވާ އެންމެ ބޮޑު އެއް ގޮންޖެހުމަކީ ކަރަންޓުގެ މައްސަލައެވެ. މި މައްސަލައަށް ދާއިމީ ހައްލެއް ހޯދުމަށްޓަކައި ޗައިނާގެ ކުންފުންޏަކާ މަޝްރޫޢުއެއް ވަނީ ހަވާލުކޮށްފައެވެ. މި މަޝްރޫޢުގެ ދަށުން 32 މެގަވޮޓްގެ ކަރަންޓު އުފައްދާ ބޭނުންކުރެވޭނެ ޕަވަރ ޕްލާންޓެއް ތަރައްޤީކޮށް، އެހެނިހެން ވަސީލަތްތައްވެސް ތަރައްޤީކުރެވޭނެއެވެ. މި މަޝްރޫޢު ކުރިއަށްދާނީ ދެ ފިޔަވައްސަކަށް ބަހާލައިގެންނެވެ. މީގެ ތެރޭގައި 9.8 މެގަވޮޓްގެ ދެ ޖެންސެޓާއި 5.8 މެގަވޮޓްގެ ދެ ޖެންސެޓް އިންސްޓޯލްކުރުން ހިމެނެއެވެ.
