ހުޅުމާލޭ ދެވަނަ ފިޔަވަހީގެ ހިޔާ ފުލެޓުތަކުގައި ދިމާވި ފެނުގެ މައްސަލަ މިހާރު ވަނީ ހައްލުކުރެވިފައިކަމަށް އެމްޑަބްލިއުއެސްސީން މިއަދު ހާމަކޮށްފިއެވެ. މިގޮތުން، އެ ކުންފުނިން މިއަދު ހެނދުނު އެކްސްގައި ކުރި ޕޯސްޓެއްގައި ވަނީ ފެނުގެ މައްސަލަ ހައްލުކޮށްފައިވާކަމަށް ބުނެފައެވެ. އަދު އެޗްޑީސީން ވެސް ވަނީ އެކަން ކަށަވަރުކޮށްދީފައެވެ.
އެޗްޑީސީގެ ފަރާތުން ހިޔާ ޓަވަރުތަކުގައި ދިރިއުޅޭ ރައްޔިތުންނަށް ފޮނުވި މެސެޖެއްގައި ބަޔާންކޮށްފައިވާ ގޮތުގައި، ފެނުގެ ޚިދުމަތް މެދުކެނޑުނީ ހިޔާ ޓަވަރުތަކަށް ފެން ދޫކުރުމަށް ބަހައްޓާފައިވާ ބޫސްޓާ ޕަމްޕަށް ދިމާވި ޓެކްނިކަލް މައްސަލައެއްގެ ސަބަބުންނެވެ. މި މައްސަލައާ ގުޅިގެން ދިމާވެދާނެ ދަތިތަކަށް އެ ކުންފުނިން ވަނީ މާފަށް އެދިފައެވެ.
މީގެއިތުރުން، ހުޅުމާލޭގެ ފުރަތަމަ ފިޔަވަހީގައި ރޭގެ ވަގުތެއްގައި ކަރަންޓު މެދުކެނޑުމުގެ މައްސަލައެއް ދިމާވިއެވެ. ކަރަންޓު ކެނޑުނު ސަބަބު ސްޓެލްކޯއިން ހާމަކޮށްފައި ނުވި ނަމަވެސް، އެ މައްސަލަ ވެސް މިހާރު ވަނީ ހައްލުކުރެވިފައި ކަމަށް އެ ކުންފުނިން ބުނެފައިވެއެވެ.
