އެމްޑީޕީން އިއުލާނު ކޮށްފައިވާ ގޮތުގައި، މިދިޔަ ބުދަ ދުވަހުގެ ރޭ ބޭއްވުނު ގައުމީ މަޖިލީހުގެ ސިއްރު ބައްދަލުވުމުގައި، ޕާޓީގެ އަސާސީ ގަވައިދާ ހިލާފުވެގެން މީގެ ކުރިން އެޅި ފިޔަވަޅުތަކާއި އަދަބުތައް ބާތިލުކުރުމަށް ނިންމާއިފިއެވެ.
ނައިފަރު ދާއިރާގެ ރައީސް އަބްދުﷲ ރަޝީދު ހަސަން ހުށަހެޅުއްވި މި ހުށަހެޅުމަށް، ހެންވޭރު އުތުރު ދާއިރާގެ ރައީސް އަދި 19 ވަނަ މަޖިލީހުގެ މެންބަރު އިބްރާހިމް މުއިއްޒު ތާއީދު ކުރެއްވިއެވެ. މި ހުށަހެޅުން ހުށަހެޅުއްވި ސަބަބެއްގެ ގޮތުގައި ފާހަގަކުރެއްވީ، އެމްޑީޕީ މިހާރު އިދިކޮޅު ޕާޓީއެއްގެ ގޮތުގައި އޮތުމާއެކު، ވީހާވެސް ގިނަ ބަޔަކާއެކު މަސައްކަތްކުރަން ޖެހޭތީއެވެ. ބައްދަލުވުމަށް ހާޒިރުވި 64 މެންބަރުންގެ ތެރެއިން 57 މެންބަރުންގެ ތާއީދާއެކު މި ހުށަހެޅުން ފާސްވިއެވެ.
މީގެ ކުރިން އެމްޑީޕީން އަޅާފައިވާ ފިޔަވަޅުތަކުގެ ތެރޭގައި، ޕާޓީއާ އަލުން ގުޅުނު ނަމަވެސް ފަސް އަހަރު ދުވަހުގެ މުއްދަތަކަށް ޕާޓީގެ އެތެރޭގެ މަގާމުތަކަށް ކުރިމަތިނުލެވޭ ގޮތަށް ހަމަޖެއްސުން ހިމެނެއެވެ. މިފަދަ ފިޔަވަޅުތައް އެޅިފައިވާ ފަރާތްތަކުގެ ތެރޭގައި، 2014 ވަނަ އަހަރު ވިޕްލައިނާ ހިލާފުވެގެން ޕާޓީން ވަކިކުރެވުނު، އޭރުގެ މަޖިލީހުގެ ނައިބު ރައީސް އަދި އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ މޫސާ) އާއި، 2023 ވަނަ އަހަރު ވިޕްލައިންއާ ހިލާފުވެގެން ވަކިކުރެވުނު، އެމްޑީޕީގެ ޕާލިމަންޓްރީ ގްރޫޕުގެ ކުރީގެ ލީޑަރު އަދި މެދު ހެންވޭރު ދާއިރާގެ ކުރީގެ މެންބަރު އަލީ އާޒިމް ހިމެނެއެވެ.
ރިޔާސީ އިންތިހާބުގެ ތެރޭގައި އެމްޑީޕީއާ އަލުން ގުޅިވަޑައިގެންނެވި މޫސާ މަނިކާއި، އިއްޔެ ޕާޓީއާ ގުޅިވަޑައިގެންނެވި އަލީ އާޒިމްއަށްވެސް މިފަދަ ފިޔަވަޅުތަކެއް އެޅިފައިވީ ނަމަވެސް، ގައުމީ މަޖިލީހުގެ މި ނިންމުމާ ގުޅިގެން، މިހާރު އެ ދެ ބޭފުޅުންނަށްވެސް އެމްޑީޕީގެ އެތެރޭގެ އިންތިހާބުތަކުގައި ވާދަކުރެއްވުމަށް އެއްވެސް ހުރަހެއް ނޯންނާނެއެވެ.
