މާލެ ސިޓީ ކައުންސިލާއި ކޮންސްޓްރަކްޝަން މިނިސްޓްރީއާ ދެމެދު، މާފަންނު ސަހަރާގެ ފެން ހިންދާ ޕަމްޕް ސްޓޭޝަން ހަލާކުވުމާއި ގުޅިގެން ޚިޔާލު ތަފާތުވުން އުފެދިއްޖެ އެވެ. މި ޕަމްޕަކީ 2014 އާއި 2018 އާ ދެމެދު އެމްޑަބްލިއުއެސްސީން މާލޭގައި ފެންބޮޑުވުމުގެ މައްސަލަ ހައްލުކުރުމަށް ބެހެއްޓި ސްޓޭޝަންތަކުގެ ތެރެއިން މާފަންނު ސަރަހައްދުގައި ބެހެއްޓި މައި ސްޓޭޝަން އެވެ.
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު ވިދާޅުވި ގޮތުގައި ސަހަރާ ހުސްކުރުމުގެ މަސައްކަތުގެ ތެރެއިން މިނިސްޓްރީއަށް އެންގުމަކާ ނުލައި މާލޭ ސިޓީ ކައުންސިލުން ވަނީ ޕަމްޕު ރޫޅާލާފައެވެ. އޭގެ ސަބަބުން އެ ސަރަހައްދުގައި އިންތިހާއަށް ފެންބޮޑުވެ، ފެން ހިންދުން ލަސްވެފައިވާ ކަމަށް މިނިސްޓަރު ފާހަގަކުރެއްވި އެވެ.
މާލޭ ސިޓީގެ މޭޔަރު އާދަމް އާޒިމް މިކަމަށް ރައްދު ދެއްވަމުން ވިދާޅުވީ ޕަމްޕު ރޫޅާލިއިރު އެ ޕަމްޕު މަސައްކަތް ނުކުރާތާ ފަސް މަހެއްހާ ދުވަސް ވެފައިވާ ކަމަށެވެ. ނަމަވެސް މިނިސްޓަރު މުއްތޮލިބު މިކަން ދޮގުކުރައްވައި، މިދިޔަ ހަފްތާގައި ވެސް ޕަމްޕު މަސައްކަތްކުރި ކަމަށް ވިދާޅުވި އެވެ. އަދި މާލެއަށް ވިއްސާރަވާ ކޮންމެ ފަހަރަކު މިނިސްޓްރީގެ މުވައްޒަފުން ޕަމްޕުތަކުގެ ހާލަތު ބަލަމުންދާ ކަމަށާއި، ޕަމްޕު މަސައްކަތްކުރާއިރާއި ނުކުރާއިރުގެ ތަފާތު އެ ސަރަހައްދުގައި ދިރިއުޅޭ ފަރާތްތަކަށް އިހުސާސްކުރެވޭނެ ކަމަށް ވިދާޅުވި އެވެ.
މި މަހުގެ ތިންވަނަ ދުވަހާއި ރޭގައި ކުރި ވިއްސާރައިގައި މާފަންނު ސަރަހައްދުގައި ވަރަށް ބޮޑަށް ފެންބޮޑުވެ، ގޭގެއަށް އެކި ވަރުގެ ގެއްލުންތައް ލިބުނެވެ. ބައެއް ގޭގޭގެ ފާހާނާތަކުން ނަޖިސް ލީކުވެ، ދިރިނޫޅެވޭ ވަރަށް ހާލަތު ގޯސްވި އެވެ. އެންޑީއެމްއޭ އިން ބުނެފައިވާ ގޮތުގައި މި މަހުގެ ތިންވަނަ ދުވަހު ކުރި ވިއްސާރައިގައި 2.2 މިލިއަން ރުފިޔާގެ ގެއްލުން ލިބިފައިވެ އެވެ.
