ހައްޖު ކޯޕަރޭޝަނުގެ ފަރޓުން މިއަހަރުގެ ހައްޖަށް ދިއުމަށް ހޮވިފައިވާ ފަރާތްތަކަށް ދައުވަތު ފޮނުވަން ފަށައިފިއެވެ. މި ދައުވަތުތައް ފޮނުވަމުން ގެންދަނީ ކުރިން އެކުލަވާލާފައިވާ ކިއު ތަރުތީބާ އެއްގޮތަށެވެ.

ދައުލަތުގެ މީޑިއާއަށް މަޢުލޫމާތު ދެއްވަމުން ހައްޖު ކޯޕަރޭޝަންގެ މެނޭޖިން ޑިރެކްޓަރު އަހުމަދު ޝަކީލް ވިދާޅުވީ، އެކި ސަބަބުތަކާ ހުރެ ބައެއް ފަރާތްތަކުން މިއަހަރު ހައްޖަށް ނުދެވޭނެކަން އަންގާފައިވާ ކަމަށާއި، އެފަދަ ޖާގަތަކަށްވެސް ކިއު ތަރުތީބުން އެހެން ފަރާތްތަކަށް ފުރުސަތު ހުޅުވާލަމުންދާ ކަމަށެވެ. އަދި މިހާރުވެސް ހައްޖަށް މީހުން ގެންދިއުމަށް ކުރަންޖެހޭ އިދާރީ މަސައްކަތްތައް ހައްޖު ކޯޕަރޭޝަނާއި އިސްލާމިކް މިނިސްޓްރީ ގުޅިގެން ކުރިއަށްދާ ކަމަށް އޭނާ ފާހަގަކުރެއްވިއެވެ.

މިއަހަރުގެ ހައްޖު ދަތުރުތައް އިންތިޒާމުކުރާނީ ހަމައެކަނި ހައްޖު ކޯޕަރޭޝަނުންނެވެ. މީގެއިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިންތިޚާބީ ވައުދާ އެއްގޮތަށް، މިއަހަރު 50 ފަގީރު ރައްޔިތުން ހައްޖަށް ފޮނުވުމަށް ސަރުކާރުން ވަނީ ނިންމަވާފައެވެ.