ޕީޕަލްސް ނެޝަނަލް ކޮންގްރެސް (ޕީއެންސީ) ގެ ހަރުގެ ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ.
މި ޖަލްސާ ފެށުމަށް ހަމަޖެހިފައިވަނީ މިރޭ 8:45 ގައެވެ. ޖަލްސާ އޮންނާނީ ކޮންގްރެސް ހައުސް، ހ. ވެޔޮވިލާގައެވެ.
މި ޖަލްސާގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާ ކަމެއް އަދި ސާފެއް ނޫނެވެ. ނަމަވެސް، މި ޖަލްސާގައި ބައިވެރިވުމުގެ ދައުވަތު ޕީއެންސީގެ މެމްބަރުންނަށް ވަނީ ދީފައެވެ.
ޕީއެންސީގެ ޖަލްސާއެއް މި ބާއްވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ތެރޭގައި ކޮރަޕްޝަންގެ މައްސަލަތަކެއް ފެންމަތިވެ، އެކަމުގެ ތަހުގީގު ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގުޅިގެން ކުރަމުން އަންނަ ދަނޑިވަޅެއްގައެވެ.
މި މައްސަލައިގައި ތަހުގީގަށް ޖާގަ ދިނުމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ އިސްތިއުފާ ދެއްވައިފައެވެ. އަދި އެ މައްސަލައާ ގުޅިގެން އެޗްޑީސީން ވަނީ 15 މުވައްޒަފަކު ވަކިކޮށްފައެވެ.
