ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު އިބްރާހިމްގެ ދަރިފުޅަށް ބިން ލިބުނު ކަމަށް މީސް މީޑިއާގައި ދެކެވެމުންދާ ވާހަކަތައް އޭނާ ދޮގުކޮށްފައެވެ.
އެޗްޑީސީގެ "ބިންވެރިޔާ" ސްކީމުގެ ދަށުން ގޯތި ނުލިބޭ ފަރާތްތަކަށް ގޯތި ދޫކުރި މައްސަލަ އާންމުންގެ މެދުގައި ހޫނުވެފައިވާ ދަނޑިވަޅެއްގައި، ވަޖީހުގެ ދަރިފުޅު އިސްމާއިލް ހާތިމް ވަޖީހަށް އެޗްޑީސީން ބިމެއް ވިއްކި ކަމަށް ބުނާ ވާހަކަތަކެއް ވަނީ ފެތުރިފައެވެ. މި މައްސަލައާ ގުޅިގެން އެޗްޑީސީން ކޮރަޕްޝަނަށް މަގުފަހިވާ ގޮތަށް ގިނަ އަމަލުތަކެއް ހިންގާފައިވާ ކަމަށް ބުނެ ގިނަ ބަޔަކު ދަނީ ފާޑުކިޔަމުންނެވެ.
މި ވާހަކަތަކާ ގުޅިގެން ވަޖީހު ވިދާޅުވެފައިވަނީ، އޭނާގެ ދަރިފުޅު ހާތިމަށް އެޗްޑީސީން ބިމެއް ވިއްކި ކަމަށް މީސް މީޑިއާގައި ފެތުރެމުންދަނީ އެއްވެސް ހަގީގަތެއް ނެތް، ކަނޑައެޅިގެން ދޮގު ވާހަކަތަކެއް ކަމަށާއި، އެފަދަ އެއްވެސް އެއްބަސްވުމެއް އެއްވެސް ފަރާތަކާއެކު ހަދާފައި ނުވާނެ ކަމަށެވެ.
އިތުރަށް ވަޖީހު ފާހަގަކުރެއްވި ގޮތުގައި، ކަންކަމުގެ ހަގީގަތް ނުބަލައި މީހުންގެ އަބުރު ނަގާލުމަށް މަސައްކަތްކުރަމުންދާކަމީ ހިތާމަކުރަންޖެހޭ ކަމެކެވެ. އަދި މިފަދަ އަސްލެއްނެތް ވާހަކަތައް ފެތުރުމުން، ބަޔަކު އެ ވާހަކަތައް ގަބޫލުކޮށް އިތުރަށް ފަތުރައި، އާއިލާތަކުގެ އަބުރު ނަގާލުމަށް މަސައްކަތްކުރަމުންދާ ކަމަށް ވެސް ވަނީ ފާހަގަކުރައްވާފައެވެ.
"ބިންވެރިޔާ" ސްކީމުގެ ދަށުން ޝަރުތު ހަމަނުވާ ފަރާތްތަކަށް ހުޅުމާލެއިން ގޯތި ދޫކުރުމަށް އެޗްޑީސީގެ ލިޔެކިޔުންތައް ފޯޖުކޮށްގެން ހިންގާފައިވާ މައްސަލަ ބަލަމުންދާއިރު، ރައީސުލްޖުމްހޫރިއްޔާ ވަނީ ކޮރަޕްޝަނުގެ އަމަލު ހިންގާ ވެރިންނާމެދު ހަރުކަށި ފިޔަވަޅު އަޅުއްވާނެ ކަމުގެ އިންޒާރު ދެއްވާފައެވެ.
