ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު "ބިންވެރިޔާ ސްކީމް"ގެ ބޭރުން ގޯތިތަކެއް ދިން މައްސަލަ ވަރަށް ސީރިއަސްކޮށް ބަލާނެކަމަށާއި، މި މައްސަލައިގެ ތަހުގީގު ކުރިއަށްދާ ވަރަކުން ތުހުމަތު ކުރެވޭ ފަރާތްތަކުގެ ޕާސްޕޯޓް ހިފަހައްޓަންޖެހޭ ނަމަ އެކަން ވެސް ކުރާނެކަމަށް ފުލުހުން ވިދާޅުވެއްޖެއެވެ. މި މައްސަލައިގެ ޖިނާއީ ތަހުގީގެއް ފުލުހުން މިހާރު ވަނީ ފަށާފައެވެ. އަދި އެންޓި ކޮރަޕްޝަން ކޮމިޝަން (އޭސީސީ)އިން ވެސް މި މައްސަލަ ތަހުގީގު ކުރަމުން އެބަދެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ވިދާޅުވީ އަދި ތަހުގީގަށް 24 ގަޑިއިރު ވެފައިވާއިރު، މިކަމުގައި އެއްވެސް ފިޔަވަޅެއް ނާޅާ ދޫނުކުރާނެ ކަމުގެ ޔަގީންކަން ދާކަމަށެވެ.
ތަހުގީގުގައި މިހާތަނަށް ވަރަށް ގިނަ ފަރާތްތަކާ ސުވާލުކޮށް، ގިނަ ހެކިތަކެއް ހޯދިފައިވާ ކަމަށް ފުލުހުން ބުނެފައިވެއެވެ. ނަމަވެސް އަދި މިހާތަނަށް އެއްވެސް ފަރާތެއްގެ ޕާސްޕޯޓް ހިފަހައްޓާފައެއް ނުވެއެވެ. ފުލުހުން މިވަގުތު އެންމެ ސީރިއަސްކޮށް ކުރިއަށްގެންދާ އެއް ތަހުގީގަކީ މިއީއެވެ.
މި މައްސަލައިގެ ތަހުގީގުގައި މިހާތަނަށް ހަ ފަރާތަކާ ސުވާލުކޮށްފައިވާއިރު، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ މައްޗަށް މިހާތަނަށް އެއްވެސް ތުހުމަތެއް ނުކުރެއެވެ. މިހާތަނަށް ތަހުގީގަށް ފާހަގަކުރެވިފައިވާ ގޮތުގައި ސައްހަނޫން ލިޔުންތަކެއް ހުށަހަޅައިގެން ބިން ހޯދުމަށް މަސައްކަތްކޮށްފައިވަނީ ތިން ބިމަކަށެވެ.
މި ބިންތަކަށް ލިޔުންތައް ހުށަހެޅި ހަ ފަރާތަކީ ސްކީމުން ޝަރުތު ފުރިހަމަނުވާ ކަމަށް ކުރިން ނިންމާފައިވާ ފަރާތްތަކެކެވެ. މި ފަރާތްތަކުގެ ތެރެއިން ބައެއް މީހުންނާ ސުވާލުކުރުމުން އެ ފަރާތްތަކުން ހުށަހެޅި ލިޔުންތައް ދީފައިވަނީ ކުރީގެ ސަރުކާރުގައި ކަމަށް ތަހުގީގަށް މަޢުލޫމާތު ދީފައިވާކަން ފުލުހުން ފާހަގަކޮށްފައިވެއެވެ.
މި މައްސަލަ ފެންމަތިވެފައިވަނީ، ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެއިން ގޯތިތަކެއް އެޗްޑީސީން ދޫކޮށްފައިވަނިކޮށް، އޭގެ ތެރެއިން ދެ ބިމެއްގެ އިންފާރު ރޭނުމުގެ ހުއްދައަށް އެދި އެޗްޑީސީން ހައުސިން މިނިސްޓްރީއަށް ފޮނުވި ސިޓީއެއް ސޯޝަލް މީޑިއާގައި އާންމުވުމުންނެވެ. މި ސިޓީގައިވާ ގޮތުން، ގޯތީގައި ފާރު ރޭނުމުގެ ހުއްދައަށް އެދިފައިވަނީ އެޗްޑީސީގެ މެނޭޖިން ޑިރެކްޓަރު ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އަބްދުލްމަޖީދު މާހިރު ކިޔާ ދިއްދޫ މީހެކެވެ. ނަމަވެސް ހައުސިން މިނިސްޓްރީން ދިން ޖަވާބުގައި ބުނެފައިވަނީ މި ގޯތިތަކަކީ އެ މިނިސްޓްރީން ހިންގި ސްކީމުގެ ދަށުން އެއްވެސް ބަޔަކާ ހަވާލުކޮށްފައިވާ ގޯތިތަކެއް ނޫން ކަމަށެވެ.
