އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ސަސްޕެންޑްކޮށްފިއެވެ.
އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، ފަޒީލް ސަސްޕެންޑް މި ކުރީ "ބިންވެރިޔާ" ސްކީމްގެ ދަށުން ހައްގު ނުވާ ގޯއްޗެއްގެ ރަޖިސްޓްރީއެއް ހަދައި، އެ ހުށަހެޅި މައްސަލާގައި ފުލުހުން ފަށާފައިވާ ތަހުގީގާ ގުޅިގެންނެވެ. ފަޒީލް އަށް ލިބުނު ގޯތީގެ ވަށާ ފާރު ވެސް ވަނީ ރާނައިފައެވެ.
އެމްޑަބްލިއުއެސްސީން ބުނީ ފަޒީލް ހުރިހާ ޒިންމާތަކަކުން ވަކިކޮށް އޮފީހަށް ނުނިކުމެވޭ ގޮތަށް ސަސްޕެންޑްކޮށްފައިވާ ކަމަށެވެ. އަދި ކުންފުނީގެ ބޯޑުން އެގޮތަށް ނިންމީ ފުލުހުން ފެށި ތަހުގީގަށް ޖާގަދިނުމުގެ ގޮތުން ކަމަށް ވެސް އެމްޑަބްލިއުއެސްސީ އިން ބުނެފައިވެއެވެ.
ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވުމާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދާއި ބޯޑު އެއްކޮށް ވަނީ ސަސްޕެންޑްކޮށްފައެވެ. ގޯތިތަކުގެ މައްސަލައިގައި ފުލުހުން ފަށާފައިވާ ތަހުގީގާ ގުޅިގެން ސަސްޕެންޑް ނުކުރަނީ ކުންފުނީގެ ޗެއާމަން އަހްމަދު ނާސިފެވެ.
ބިންވެރިޔާ ސްކީމްގެ ދަށުން ފަޒީލަށް ގޯއްޗެއް ނުލިބެއެވެ. އެކަމަކު، އޭނާ އަށް ގޯތީގެ ރަޖިސްޓްރީ ދިން މައްސަލައެއް ވަނީ ފެންމަތިވެފައެވެ.
ފަޒުލް ވިދާޅުވީ "ބިންވެރިޔާ" ސްކީމްގެ ދަށުން އެޗްޑީސީން އެއްވެސް ބިމެއް ނުދޭނެ ކަމަށާއި އެ ސްކީމްގެ ދަށުން ބިން ލިބޭ އެއްވެސް މީހަކު އިސްތިސްނާވާ ގޮތަކަށް އެޗްޑީސީން އެއްވެސް ކަމެއް ކޮށްފައި ނުވާނެ ކަމަށެވެ. ހައުސިން މިނިސްޓްރީން ނާންގާ ފަރާތަކަށް ބިމެއް ދީފައި ނުވާނެ ކަމަށް ފަޒުލް ވިދާޅުވިއެވެ. އެކަމަކު، "ބިންވެރިޔާ" ސްކީމްގެ ދަށުން ވަކި ބަޔަކަށް ބިން ދިން ކަން އެނގިގެން އެކަން އިސްވެ، ހައުސިން މިނިސްޓްރީއަށް ހުށަހެޅީ ވެސް އެޗްޑީސީގެ ފަރާތުން ކަމަށް ވެސް ފަޒުލް ވިދާޅުވިއެވެ.
"ބިންވެރިޔާ ސްކީމްގެ ރަޖިސްޓްރީ އިޝޫ ކުރަނީ އެޗްޑީސީގެ ފަރާތަކުން ނޫން. އިޝޫކޮށްފައި އޮތީކީ ވެސް އަޅުގަނޑުމެންނެއް ނޫން. ކުރީ ސަރުކާރުން އިޝޫ ކުރި ބިންވެރިޔާ ސްކީމްގެ ޕްލޮޓްތަކެއްގެ ރަޖިސްޓްރީ އެބަހުރި. އެގްރީމަންޓް ހަދަނީ ވެސް އެޗްޑީސީގެ ފަރާތަކުން ނޫން. ބިން ހަވާލު ކުރަނީ އެޗްޑީސީގެ ފަރާތަކުން ނޫން. އެހެންވީމަ އަޅުގަނޑުމެން މި ޕްރޮސެސް މި ދަންނަވާލީ،" ފަޒުލް ވިދާޅުވިއެވެ.
ފަޒުލް ވިދާޅުވި ގޮތުގައި އެޗްޑީސީން ޝާމިލްވަނީ ޕޯޓަލްއަށް އެޕްލިކޭޝަން ލިބޭ ހިސާބުންނެވެ. އެހެންވީމަ، "ބިންވެރިޔާ" ގެ ޕްލޮޓްތަކަކީ އެޗްޑީސީން ޝާމިލްވެގެން ދިން ޕްލޮޓްތަކެއް ނޫން ކަމަށް ފަޒުލް ވިދާޅުވިއެވެ.
