ބިންވެރިޔާ ސްކީމުން ބޭރުން އެޗްޑީސީން ބައެއް ފަރާތްތަކަށް ހުޅުމާލެއިން ގޯތި ދީފައިވާކަމަށް ކުރެވިފައިވާ ތުހުމަތުތަކާއި ގުޅިގެން، ބިންވެރިޔާ ސްކީމުން ހުޅުމާލެއިން ގޯތި ލިބިފައިވާ އެއްވެސް ފަރާތެއްގެ ހައްގަކަށް އުނިކަމެއް ނާންނާނެކަމަށް ސަރުކާރުގެ ފަރާތުން ވިދާޅުވެއްޖެއެވެ.
ހުޅުމާލެއިން ގޯތި ދިނުދިނުމުގައި ކޮރަޕްޝަންގެ ބޮޑެތި އަމަލުތަކެއް ހިންގާފައިވާކަމަށް ކުރެވިފައިވާ ބޮޑެތި ތުހުމަތުތަކާއި ގުޅިގެން މިހާރު ކުރިޔަށްދާ ތަހުގީގަށް ޖާގަ ދިނުމުގެ ގޮތުން، އެޗްޑީސީގެ އެމްޑީ ފަޒުލް ރަޝީދުއާއި ބޯޑުގެ ބައެއް މެމްބަރުން ޕީސީބީން ސަސްޕެންޑް ކޮށްފައިވާކަން ހާމަކޮށް، ތަރުޖަމާން ހީނާ ވަލީދު މިއަދު ކުރެއްވި އެކްސް ޕޯސްޓެއްގައި ވިދާޅުވީ، އެޗްޑީސީގެ ބޯޑުގެ ޗެއަރމަން ފިޔަވައި، ކުންފުނީގެ މެނޭޖިންގ ޑިރެކްޓަރާއި އެހެން ހުރިހާ މެންބަރުން ތަޙްްޤީޤު ނިމެންދެން ސަސްޕެންޑް ކޮށްފައިވަނީ، ފުލުހުން އިސްނަގައިގެން އެޗްޑީސީގައި ކުރިއަށްގެންދާ ޖިނާއީ ތަޙުޤީޤު މިނިވަންކަމާއެކު ބާރަށް ކުރިއަށް ގެންދިއުމަށް ޖާގަ ދިނުމަށް ކަމަށެވެ.
މިކަމާގުޅިގެން ގޯތި ލިބިފައިވާ އެއްވެސް ފަރާތެއްގެ އެއްވެސް ޙައްޤަކަށް އުނިކަމެއް ލިބިފައިނުވާކަން އަދި ނުވެސް ލިބޭނެކަމުގެ ޔަޤީންކަން ހުރިހާ ފަރާތްތަކަށް އަރުވަމެވެ.
ހީނާގެ އެކްސް ޕޯސްޓުގައި ވިދާޅުވެފައި ވެއެވެ.
ކުރީ ސަރުކާރުގެ ބިންވެރިޔާ ސްކީމްގެ ދަށުން ޝަރުތު ހަމަނުވާ ފަރާތަކަށް ގޯތި ދިންކަމަށް ކުރެވޭ ތުހުމަތާމެދު އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ ރޭ ނޫސްވެރިންނާއި ބައްދަލުކޮށް، ތުހުމަތުތަކަށް ރައްދުވެސް ދެއްވާފައެވެ.
މިދިޔަ އަހަރުގެ އޮގަސްޓު މަހު އެކުލަވާލި ބިންވެރިޔާ ސްކީމްގެ ފައިނަލް ލިސްޓުގައި ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ އެމްޑީ މުހައްމަދު ފަޒީލް ރަޝީދުގެ ނަން ހިމެނުނެވެ. އެހެންނަމަވެސް، އޭނާއަށް ކުރިން ސަރުކާރުގެ އަސާސީ ބޯހިޔާވަހިކަމުގެ ސްކީމަކުން ގޯއްޗެއް ލިބިފައިވާތީ، ޝަރުތު ހަމަނުވާކަމަށް ވަނީ ފާހަގަކޮށްފައެވެ. ނަމަވެސް މީޑިއާގައި އާންމުވެފައިވާ ލިޔެކިޔުންތަކުން ދައްކާގޮތުގައި، އެ ސްކީމްގެ ދަށުން ފަޒީލަށް ގޯތި ދިނުމަށް އެއްބަސްވެ، އެއްބަސްވުމެއްގައި ސޮއިކޮށްފައިވެއެވެ.
މި މައްސަލައާ ގުޅޭގޮތުން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފަޒުލް ވިދާޅުވީ، އޭނާގެ އާއިލާގެ މެންބަރުންގެ ނަން ލިސްޓުގައި އޮތް ނަމަވެސް، ގޯތި ހައްގުވާކަން ނިންމުމަކީ ހައުސިން މިނިސްޓްރީގެ ޒިންމާއެއް ކަމަށެވެ. އަދި ގޯތި ދޫކުރުމަކީ އެޗްޑީސީން ކުރާ ކަމެއް ނޫން ކަމަށް އޭނާ ވަނީ އިތުރަށް ފާހަގަކުރައްވާފައެވެ. "މި މައްސަލައިގައި ބޭބެއަށް ވުމަކީ އިއްތިފާގެއް، އަޅުގަނޑުގެ އިޝޫއެއް ނެތޭ ތިޔަކު" ކަމަށް ފަޒުލް ވިދާޅުވިއެވެ.
