ސްޓެލްކޯގެ މުވައްޒަފުން މިހާރު ދަނީ އަލިފާނުގެ ހާދިސާއިން ގެއްލުން ލިބުނު ތިން މިނިސްޓްރީގެ މަސައްކަތްތައް އަލުން ފެށުމަށް މަސައްކަތްކުރަމުންނެވެ. މިކަމާ ގުޅިގެން ފަހުމީ ވަނީ ސްޓެލްކޯގެ މުވައްޒަފުންނަށް ޝުކުރު އަދާކުރައްވާފައެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ފަހުމީ ވިދާޅުވެފައިވަނީ، ދަރުބާރުގޭގައި ކުރެވެމުންދާ މަސައްކަތްތަކުގެ ތެރެއިން ކަރަންޓާ ގުޅުންހުރި އެންމެހައި މަސައްކަތްތަކުގައާއި އެހެނިހެން އެހީތެރިކަން ބޭނުންވާ ކަންކަމުގައި ސްޓެލްކޯގެ މުވައްޒަފުން ދެއްވަމުންދާ އެހީތެރިކަމަށް އިޚްލާޞްތެރިކަމާއެކު ޝުކުރު އަދާކުރައްވާ ކަމަށެވެ. އަދި ސްޓެލްކޯގެ މުވައްޒަފުންނަކީ ޤައުމަށާއި ރައްޔިތުންނަށް ދިމާވާ މިފަދަ ކޮންމެ ކަމެއް ޤައުމީ ޒިންމާއެއްގެ ގޮތުގައި ދެކި، ނަމޫނާ ދައްކަމުންދާ ފަޚުރުވެރި މުވައްޒަފުންތަކެއް ތިބި ކުންފުންޏެއްކަމަށްވެސް ވަނީ ފާހަގަކުރައްވާފައެވެ.
އަލިފާނުގެ ހާދިސާއާ ގުޅިގެން ޚިދުމަތް މެދުކެނޑިފައިވާ ތިން މިނިސްޓްރީގެ މަސައްކަތްތައް އަލުން ފެށުމަށްޓަކައި، ދަރުބާރުގޭގައި ކުރެވެމުންދާ މަސައްކަތުގެ ތެރެއިން ކަރަންޓާ ގުޅުންހުރި އެންމެހައި މަސައްކަތްތަކާއި، އެހެނިހެން ދާއިރާތަކުން އެހީތެރިކަން ބޭނުންވާ ކަންކަމުގައި މި… pic.twitter.com/vP3VF1sDmS
— STELCO (@STELCOMALDIVES) December 14, 2024
އަމީނީ މަގުގައި ހުންނަ ދިވެހިރާއްޖޭގެ އަޑު ކުރިމަތީގައިވާ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގައި ހިނގި އަލިފާނުގެ ހާދިސާގައި އެ ދެ އިމާރާތަށް ވަނީ ބޮޑެތި ގެއްލުންތަކެއް ލިބި، ބޭނުން ނުކުރެވޭ ހާލަތަށް ގޮސްފައެވެ. މީގެއިތުރުން، އެންވަޔަރަމަންޓް މިނިސްޓްރީ އާއި އީޕީއޭ ހިންގަމުން އައި ގްރީން ބިލްޑިންގއަށްވެސް ވަނީ އަލިފާނުގެ ސަބަބުން ގެއްލުން ލިބިފައެވެ. މި ހާދިސާއާ ގުޅިގެން މި ތިން ވުޒާރާގެ މަސައްކަތްތައް ވަގުތީގޮތުން ދަރުބާރުގެއަށް ބަދަލުކުރުމުގެ މަސައްކަތް މިހާރު ދަނީ ކުރެވެމުންނެވެ.
