މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމަށް ރައީސުލްޖުމްހޫރިއްޔާ ހުށަހަޅުއްވާފައިވާ ފަރާތްތަކާ ގުޅޭގޮތުން ޢާންމުންގެ ޝަކުވާ ހުށަހެޅުމުގެ ފުރުޞަތށް ރައްޔިތުންގެ މަޖިލީހުން މިއަދު ހުޅުވާލައިފިއެވެ.
ބްރޯޑްކޮމްގެ މެންބަރުންގެ ތެރެއިން ދެ މެންބަރެއްގެ ދައުރު މި މަހުގެ ތެރޭގައި ހަމަވެފައިވާއިރު، އެއީ ކޮމިޝަންގެ ރައީސް މަރިޔަމް ވަހީދާ އަދި މެންބަރު އަލީ ޔޫސުފްއެވެ. މި މަޤާމުތަކަށް ކުރިމަތިލުމުގެ ފުރުޞަތު ހުޅުވާލުމުން ޝަރުތު ހަމަވާ 12 ފަރާތަކުން ވަނީ ކުރިމަތިލައްވާފައެވެ.
ރައީސް މުޙައްމަދު މުޢިއްޒު ވަނީ އެ މަނިކުފާނު އިސްކަންދެއްވާ ތަރުތީބުން ކެންޑިޑޭޓުންގެ ނަންތައް މަޖިލީހަށް ފޮނުއްވާފައެވެ. އެގޮތުން ލިސްޓުގެ އެންމެ އިސް ފަރާތްތަކުގެ ގޮތުގައި ހިމެނެނީ އިހަވަންދޫ ދާއިރާގެ ކުރީގެ މެންބަރު މުޙައްމަދު ޢަބްދުﷲ އާއި ކުރީގެ ރައީސް ޔާމީންގެ ސަރުކާރުގެ ރައީސް އޮފީހުގެ ތަރުޖަމާނު މުޢާޒެވެ. މީގެ އިތުރުން އިބްރާހީމް އަޝްރަފް، ލެފްޓިނެންޓް ކާނަލް ރިޓަޔަރޑް ޒުބައިރު އަޙްމަދު މަނިކު، ޢަބްދުﷲ ޙުމައިދު، ޢާއިޝަތު ދިޔާނާ ޠާހިރު، އާމިނަތު ސަރާޙަތު ޢިއްޒަތު، ޝިމްލާ އަޙްމަދު، އިސްމާޢީލް ޝަފީޤު، ޝިފްޒާ މުޞްޠަފާ، ޢަލީ ނިޝާން އަދި މުޙައްމަދު ޝަމީމްގެ ނަން ހިމެނެއެވެ.
މި ނަންތައް ދިރާސާކުރުމަށް ވަނީ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ. މި ފަރާތްތަކާ ގުޅޭގޮތުން އެއްވެސް ޝަކުވާއެއް އޮތް ފަރާތްތަކުން 19 ޑިސެމްބަރު ވާ ބުރާސްފަތި ދުވަހުގެ މެންދުރު 12:00 ގެ ކުރިން، ޝަކުވާ ހުށަހަޅާ ފަރާތުގެ ފުރިހަމަ ނަމާއި ދާއިމީ އެޑްރެސް އަދި ގުޅޭނެ ނަންބަރާއެކު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް އީމެއިލް މެދުވެރިކޮށް ނުވަތަ ސީދާ މަޖިލީހުގެ އިދާރާއަށް ލިޔުމުން ހުށަހެޅުމަށް ވަނީ އަންގާފައެވެ.
