މާލޭގައި ހުންނަ ގްރީން ބިލްޑިންގްގައި މިއަދު ހެނދުނު ރޯވި އަލިފާންގަނޑާ ގުޅިގެން، އެ ސަރަހައްދުގެ ގެތަކުން ނުކުންނަން ޖެހުނު 50 އެއްހާ މީހުންނަށް ސޯޝަލް ސެންޓަރުން ވަގުތީ ބޯހިޔާވަހިކަން ފޯރުކޮށްދީފިއެވެ.
ހައުސިންގ މިނިސްޓްރީއާއި އިންފްރާސްޓްރަކްޗަރ މިނިސްޓްރީގެ އިތުރުން މާލޭ ސިޓީ ކައުންސިލްގެ މަސައްކަތްތައް ހިންގާ މި އިމާރާތުގައި ރޯވި އަލިފާން ނިއްވުމުގެ މަސައްކަތް އެމްއެންޑީއެފްގެ ފަޔަރ އެންޑް ރެސްކިއު ސަރވިސަސްއިން ދަނީ ކުރަމުންނެވެ. ދުމުގެ އަސަރު ބޮޑުވުމާ ގުޅިގެން، އަލިފާން ރޯވި އިމާރާތާ ކައިރީގައި ހުރި ގެތަކުން މީހުން ވަނީ ނެރެފައެވެ.
މި ހާދިސާއާ ގުޅޭގޮތުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ގެ ޗީފް އެގްޒެކެޓިވް ހިސާން ހަސަން ވިދާޅުވީ، ދުމުގެ އަސަރު ކުރާ ސަރަހައްދުތަކުން މީހުން ނެރުމަށްޓަކައި ސޯޝަލް ސެންޓަރުގައި އިވެކުއޭޝަން ސެންޓަރެއް ޤާއިމްކޮށްފައިވާ ކަމަށެވެ. މި މަސައްކަތުގައި އެންޑީއެމްއޭއާއި ދިވެހި ރެޑް ކްރެސެންޓްގެ އިތުރުން އެހެނިހެން ފަރާތްތައްވެސް ހަރަކާތްތެރިވަމުންދާ ކަމަށް އޭނާ ފާހަގަކުރެއްވިއެވެ.
އަސަރުކުރި ފަރާތްތަކަށް ކެއުމާއި ބުއިމުގެ އިތުރުން ނަފްސާނީ އެހީތެރިކަންވެސް ފޯރުކޮށްދެވޭނެ ކަމަށް ހިސާން ވިދާޅުވިއެވެ. އަދި ގެތަކަށް އަނބުރާ ދިއުމުގެ ކުރިން އެތަންތަނުގެ ރައްކާތެރިކަން ކަށަވަރުކުރުމަށް އެސެސްމަންޓްތައް ހެދުމަށްފަހު ސަލާމަތީ ޚިދުމަތްތަކުގެ ހުއްދަ ހޯދާނެ ކަމަށްވެސް އޭނާ ވިދާޅުވިއެވެ. ގޭގައި ތިބުން ރައްކާތެރި ނޫން ކަމަށް ފެންނަ ފަރާތްތަކަށް އެހެނިހެން ގޮތްގޮތުން ބޯހިޔާވަހިކަމާއި އަސާސީ ޚިދުމަތްތައް ފޯރުކޮށްދެވޭނެއެވެ.
މިވަގުތު އެންމެހާ ފަރާތްތަކުން ސޯޝަލް ސެންޓަރުގައި ޤާއިމުކޮށްފައިވާ އިވެކުއޭޝަން ސެންޓަރަށް ދިއުމަށާއި، އެތާ ތިބެ އެންޑީއެމްއޭގެ ޓީމުތަކުން ދޭ އިރުޝާދުތަކާ އެއްގޮތަށް ޢަމަލުކުރުމަށް ހިސާން އިލްތިމާސްކުރެއްވިއެވެ. މިހާރު ގްރީން ބިލްޑިންގް ވަނީ އަނދައި ހުލިވެ، ބޭނުން ނުކުރެވޭ ހާލަތުގައެވެ. އަދި އެ ސަރަހައްދު ވަނީ ބަންދުކުރެވި، ފުލުހުން އެ ސަރަހައްދުގައި ހަރަކާތްތެރިވަމުންނެވެ.
